pb 195 v
ces cosez tenuez en secret, et fu la dame environ le Pentecouste amenee en Braibant,
daléz la duçoise, qui le rechut liement et qui l’ordonna a l’usage de France, et
estoit en sa compaignie li dus Fedris de Baiviere, sez onclez, et par le quel ly mariagez
au voir dire estoit premierement promeus par le maniere et raison que je
vous diray.
SHF 2-447 sync Quant ly dus Fedris de Baiviere vint premierement en France et il fu devant
Bourbourc ou service dou roi de France, voirs est que il fu festiiéz et conjois dez
onclez dou roy et des roiaulx moult grandement, pour la cause de ce que il estoit
venus servir le roy de lonch païs de Baiviere et de plus de IIC lieuez loing, sy
tinrent dou dit duc le service a grand, et fu tousjours logiéz moult priéz dou roy,
en cause d’amour, et acompaigniéz des onclez dou roy, et quant il se departy de Baivi
ere, il quida certainement que li rois de France et li rois d’Engletiere deuissent a
voir en la marce de Flandrez ou de France bataille adrechié ensamble, si com la
vois et renommee couroient adonc par tout Alemaigne, et pour ce l’en savoient li rois
de France et si oncle plus grant gret. Et estoit avenut, estant en che voiage de
Berghez et de Bourbourc, que li oncle dou roy, enssi que signeur se devisent ensam
ble, ly avoient demandé moult amiablement se il avoit nulle fille a marier, et que
il convenoit une femme au roy de France, e plus chier l’aroient il a marier en Bai
viere que ailleurs. Car li Baivier anchiennement ont toudis esté dou conseil de
France. A cez parollez avoit respondu ly dus Fredris et dit que nenil, mais ses
frerez ainsnéz li dus Estievenez de Baiviere en avoit une belle. "Et de quel eage?" a
voient demandé ly oncle dou roy. "Entre XIII ans et XIIII," avoit respondu ly
dus Fedris. Dont dissent ly oncle dou roy: "C’est tout ce que il nous faut, vous
retourné en Baiviere, parléz ent a vostre frere, et amenéz vostre cousine en pelerinage
a Saint Jehan d’Amiens, et ly rois sera contre ly, se il le voit, espoir le golousera
il. Car il voit volentiers toutez bellez cosez et lez ayme, et, se elle li eschiet
en coer, elle sera roine de France." Enssi alerent lez premierez convenencez, ne plus
n’y ot dit ne fait. Et n’en savoit ly rois de France noient que on eust parlé de
son mariage. Et quant li dus Fedris fu retournéz en Baiviere, il remonstra
toutez ces parollez a son frere le duc Estievene, qui pensa moult longuement sus,
et ly respondy: "Biau frere, je croy moult bien que il soit enssy que vous me ditez
et ma fille seroit bonneewireuse, se elle pooit escheir ne venir a si haute
honneur comme de estre roine de France, mais ils est moult loing de chy, et si y a
trop grant regard a faire une roine et femme dou roy, si seroie trop courouchiéz,
se on avoit mené en France ma fille, et puis elle me fust renvoyé, je ay asés
plus chier que je le marie a mon aisse daléz moy." Che fu la response que ly dus pb 196 r