pb 191 r
sus esciellez. Car ly François montoient delivrement, et se combatoient sus
lez murs main a main et de daghez, et fissent tant li François que, par bon
assaut, ly castiaulx fu pris et conquis, et cil dedens mort, petit en y ot de
sauvéz. Quant li signeur de France eurent le posession de Montleu, il le
remparerent et rafresquirent de nouvellez gens et de pourveancez,
et puis s’en vinrent le chemin de Taillebourc sus la Carente, de la quelle
forterece Durandon de la Perade, uns Gascons, estoit capitains, appert homme
d’armez, et ne fist point grant compte des François, quant il vinrent.
En venant vers Taillebourc, ly dus de Bourbon et sez routez prisent II
petis fors d’Engléz, ly quel toute la saisson avoient moult heriiet lez frontierez
de Poito et de Limosin, la Troncete et Archiac, et furent mort tout cil qui
dedens estoient, et ly castiel rendu a ceux dou païs environ, qui les a
batirent tous deus.
SHF 2-438 sync Or fu li siegez mis devant le castiel de Thaillebourc. Et fu assis par IIII
bastidez et par IIII lieux, a Taillebourc a I pont qui siet sus la Carente.
Et l’avoient ly Engléz et ly Gascon qui le tenoient, fortefiiet, et toute le
saison point de navire alant en La Rocelle et en Sainctonge n’avoit
peu passer, fors a grant dangier et par trieuage. Lors s’aviserent ly signeur
que il prenderoient le pont, s’aroient mains a faire et se logeroient plus
seurement en leurs bastidez. Adont ordonnerent il par quel maniere, il
fissent venir de La Rocelle nefs toutez armeez et apparilliez contremont
la Carente, et missent dedens grant fuisson d’arbalestriers et de Jenevois.
Et envoiierent ces gens escarmuchier a ceux dou pont, la ot dur assault.
Car ly Englés et li Gascon avoient mallement le pont fortefiiet, si se
deffendoient aigrement et vaillaument. Et ossi il estoient assailly de
grant volenté par terre et par la riviere. Et la fu fais chevaliers a cel assault ly
ainsnéz filz au conte de Harcourt, Jehans, et bouta baniere hors, et le fist chevalier
sez onclez ly dus de Bourbon. Cils assaulx au pont a Taillebourc fu moult
biaux et mout fors et bien continuéz, et y ot fait tamainte appertisse d’armez,
et traioient cil Jenevois et arbalestrier qui estoient en cez nefs, a ceux
dou pont, si roit et si dur et si ouniement, que a painez se osoit nulz a
monstrer a deffence. Que vous feroie jou lonc compte? Par biel assaut ly
pons de la riviere sus le passage de Taillebourc fu conquis, et tout cil
ochils ou noiiet, qui dedens furent trouvé, onquez nulz n’en escapa, ensi pb 191 v