pb 167 v
tout en grant orguel, et leur sambla bien que toute Flandrez fust leur, et
au voir dire, se il fussent adont venu devant Brugez, pluiseurs gens dient
et dissoient adont, qui bien quidoient savoir le convenant de ceux de Brugez,
que elle se fust rendue englesque. Or ouvrerent li Englois autrement. Car
il eurent conseil de aler devant Bourbourc et de prendre la ville, et puis
venir devers Aire et devers Casel, et de conquerir tout le païs, et riens
laissier derriere qui leur fust contraire ou ennemy, et puis venir devant
Yppre. Il avoient ymaginacion et intencion que la ville d’Ippre se rende
roit tantos quant il veroient le païs rendu. Lors se departirent ly Englois
de Dunquerque, quant il en orent fait leur volenté, et vinrent devers
Bourbourc. Quant chil de Bourbourc les sentirent aprochier, il furent
sy effraé que tantos il se rendirent salve lors viez et leurs biens, enssi furent
il pris, et entrerent en la ville et en orent grant joie. Car il dissent que
il en feroient une belle garnisson, pour guerriier et heriier cheux de
Saint Omer et des frontierez prochainez, aprés che il prissent le castiel de
Dricehem, et furent trois jours devant, anchois que il le peuissent avoir,
et l’eurent par force, et y ot mort plus de IIC hommez, qui la se tenoient en
garnisson. Si le remparerent ly Englois, et dissent que il le tenroient a
leur loyal pooir, et le rafresquirent de nouvellez gens, et puis chevauchi
erent oultre, et vinrent a Cassel et prissent la ville, et la orent grant pilla
ge. Adont le repourveirent il de leurs gens, et puis si s’en partirent, et
dissent que il voloient venir veoir la ville d’Aire, mais bien savoient
ly pluiseur, qui le congnissoient, que elle n’estoit pas a prendre ne asalir, et
que trop leur cousteroit. Toutezfois li evesquez de Nordvich dist que il
le voloit veoir de priéz.
SHF 2-372 sync A che estoit cappitaine de la ville d’Aire uns gentilz chevaliers pikars qui s’a
pelle, ou appelloit pour le temps, messires Robers de Biethune et viscontes
de Miaulx, avoec luy estoient et de sa carge messires Jehans de Roie, ly sirez
de Clary, messires Jehans de Biethune, ses frerez, ly sirez de Montegny, messires Per
ducas dou Pont Saint, messires Jehans de Kauny et messires Florens, sez filz, et
pluiseurs autrez, et tant que il estoient bien environ VIXX lancez de bonnez
gens d’armez, chevaliers et escuiers. Quant ly evesquez de Nordvich, messires
Huez de Cavrelee, messires Henris de Biaumont, messires Thomas Trivéz, messires Guil
laumez Helmen, messires Mahieux Rademen et li autre deurent aprochier
Aire, et il furent venu aséz priéz sus un heu et un pas que on claime pb 168 r