pb 128 r
l’Escaut, enssi estoit toute la ville de Audenarde environnee, et quidoient bien
par tel siege ly Flament afamer ceulx de dedens, mais a le fois ly compaignon
yssoient et faissoient des envaiez, une eure perdoient, l’autre gaagnoient, ensi
comme a tels besongnez ly fait d’armez aviennent, mais toutezfois d’assaus
n’y avoit nulz fais. Car Phelippez ne voloit pas follement aventurer sez
gens. Et dissoit que tout sans asallir il aroient la ville et que par raison
elle ne se pooit tenir longhement, quant il n’estoient conforté ne ne pooient
estre de nul costé, ne a painez uns oiselléz ne volost miez en Audenarde que
il ne fust veus de ceulx de l’ost, tant bien avoient il environné la ville
a tous lés.
SHF 2-300 sync Or retournons au roy de France et a son conseil, ly oncle dou roy et ly con
saulx de France avisserent pour le mieux que il envoieroient a Tour
nay aucuns prelas et chevaliers dou royaulme, pour traitier a cez Flamens de
Flandrez et pour savoir plus plainement leur entente. Sy furent esleu et
ordonné de venir a Tournay messires Millez des Dormans, evesquez de
Biauvais, ly evesquez d’Auchoire, ly evesquez de Laon, messires Guis de Honcourt
et messires Tristrans dou Bos. Et vinrent chil a Tournay comme commissaire
depar le roy de France, et la s’aresterent. Quant il furent venu, aséz nouv
ellement estoient retourné de l’ost de devant Audenarde Jehan Bonen
fant et Jehans Pietars, qui remonstrerent a cez prelas et chevaliers commissairez
dou roy comment Phelippez d’Artevelle, au congiet prendre, leur avoit dit
et que ly Flament n’entenderoient jamais a nul tretiet jusquez a tant que
Audenarde et Tenremonde leur seroient ouvertez. "Bien," respondirent
ly commissairez, "se chilz Phelippez, par orguoel et beubant dont il est plains,
fait sa grandeur, espoir, che n’est pas ly acors dez bonnez villez de Flandrez.
Sy escriprons a Brugez, a Gand, a Yppre, et envoierons depar nous a cascune
ville une lettre et un mesagier, par aucune voie faut il entrer ens es coses, puis
que on lez voelt commenchier. Et nous ne sommez pas chi venut pour guerriier,
mais pour traitiier envers cez maleois Flamens." Adont escripsirent cil con
missaire trois lettres as trois villez et princhipaux de Flandrez, et y mettoient
en cascune Phelippe d’Artevelle en ligne et ou premier chief, si contenoient
les lettres enssi :
SHF 2-301 sync A Phelippe d’Artevelle et a ses compaignons et as bonnez gens des III
bonnez villez de Flandrez et le Franc de Brugez. "Plaise vous savoir que
ly rois, nostrez sirez, nous a envoiiéz en cez partiez en espece de bien, pour
paix et acord faire, comme souverain signeur, entre noble prinche, son cousin, pb 128 v