pb 120 v
doient la grace et la mesericorde de Dieu. Tout che fu fait, on celebra en l’ost en
VII lieux messez, et a cascune messe ot sermon, li quel sermon durerent plus de
heure et demie. Et la leur fu remonstré par ces clers, Frerez Menours et autrez,
comment il se figuroient au peuple d’Israel que li rois Faraon d’Egipte tint
lonctamps en servitude, et comment depuis, par la grace de Dieu, il en furent
delivret et menet en tere de promision par Moise et Aaron, et li rois Pharaon
et li Egiptiien mort et peri. "Enssi, bonnez gens," dissoient chil Frere Pre
ceur "en leurs sermons, estez vous tenu en servitude par vostre signeur le conte
et vos voisins de Brugez, devant la quelle ville vous estez venu et arresté,
et serés combatu, il n’est mie doubte. Car vostre ennemy en sont en grant
volenté, qui petit amirent vostre poissance. Mais ne regardéz pas a cela.
Car Dieux, qui tout puet, tout set et tout congnoist, ara merchy de vous, et
ne pensséz point a cose que vous aiiéz laissiet deriere. Car vous savéz
bien que il n’y a nul recouvrier ne restorier, se vous estez desconfy. Vendéz
vous vaillanment, et moréz, se morir convient, honnerablement, et ne vous
esbahissiéz point, se grans peuplez ist de Brugez contre vous. Car la vic
toire n’est pas ou peuple, mais la ou Dieux l’envoie et maint par sa grace, et
trop de fois on a veü, par les Macabiiens ou par les Roumains, que li petis
peuples de boine volenté et qui se confioit en la grace de Nostre Signeur,
desconfissoit le grant peuple. Et en ceste querelle vous avéz bon droit
et juste cause par trop de raisons. Sy en devéz estre plus hardy et mieux
conforté." De tellez parollez et de pluiseurs autrez furent les Frerez Preceurs
che samedy au matin ly Gantois prechiet et remonstré, dont moult il
se contenterent, et se acumeniierent les III pars des gens de l’oost, et
missent tout en grant devotion, et monstrerent tout grant cremeur
avoir a Dieu.
SHF 2-273 sync Appriés ces messez tout se missent ensamble en un mont, et la
monta Phelippez d’Artevelle sur un char pour ly monstrer a tous et
pour estre mieus oys. Et la parla de grant sentement, et leur remonstra
de point en point le droit que il penssoient a avoir en ceste querelle,
et comment par trop de fois la ville de Gand avoit requis et priiet merci
envers leur signeur le conte, et point n’i avoient peut venir sans trop
grant confusion et damage de ceulx de Gand. Or estoient il sy avant trait
et venut que reculler il ne pooient et aussi au retourner, tout consideré,
riens il ne gaigneroient. Car nulle cose deriere fors que povreté et tristrece
laissiet il n’avoient. Si ne devoit nulz pensser aprés Gand ne a femme ne pb