pb 94 r
fissent toute celle honneur, et vraiement li gentilz chevaliers le valoit c’on ly fisist. Car
en son tamps il eut toutez lez noblez vertus que uns gentilz chevaliers doit avoir.
Il fu liéz, loyaux, amoureux, sagez, secrés, largez, preux, hardis, entreprendans
et chevalereux. Enssi fina messires Guichars d’Angle.
SHF 2-226 sync Quant li dus de Lanclastre fu retournéz d’Escoce en Engletiere, et il ot remo
nstré au roy et a son conseil comment il l’avoit exploitié dez trieuwez qui
estoient prissez et accordeez entre eux et lez Escos. Il n’oublia mie comment messires
Mahieux Radanen, cappitainne de Bervich, quoique il escusast le chevalier, li avoit
clos lez portez de Bervich au devant, au commandement et ordenance dou conte
de Northombrelande, et que ce fait il ne pooit oubliier. Et en parloit li dus en
telle entente que se li roissez nepveus l’avooit, et ouil, il l’avoua voirement,
mais il sambla au duc que ce fust asséz morbement. Dont s’apaissa ly dus, et atendy
la feste de la Nostre Dame, en le moiienne d’aoust, que li rois d’Engletiere tint
court solempnelle a Westmoustier. Et la furent grant fuisson dez haus barons
d’Engletiere, et tant que li contez de Northombrelant y fu, et li contez de Notin
ghem et grant fuisson dez barons dou nort. Et fist che jour ly rois chevaliers, premiers,
le jone conte Jehan de Pennebruc, messire Robert Banbre, messire Nicolas Tinfort et
messire Adam François, et lez fist li rois a telle entente que il volloit, le feste passee,
aler vers Redinghez, vers Asquesufort et vers Conventré, et cerquier toute la
frontiere et pugnir les mauvais, enssi qu’il fist, qui s’estoient rebellé a l’en
contre de luy, en la maniere que il avoit fait en la conté de Kemt, d’Exsexes
et de Sousexes, de Beteforde et de Cambruge. A celle feste et solempnité qui
fu le jour Nostre Dame, en my aoust, a Wesmoustier, apriéz disner, ot grandez
parollez et grossez dou duc de Lanclastre au conte de Nortombrelande. Et ly
dist : "Henry de Persi, je ne quidoie pas que vous fuissiéz si grans en Engle
tiere que vous ossissiéz faire clore et fremer les chittéz, lez villez et
les castiaux a l’encontre dou duc de Lanclastre !" Ly contez s’umelia en parlant,
et dist : "Monsigneur, je ne desvoe pas ce que ly chevaliers en fist, car je ne poroie.
Et ens ou commandement que j’avoie dou roy, mon signeur que vela, il m’estoit
si estroitement enjoint et commandé que sus men honneur et sus ma
vie je ne laiaisse ne fesisse laissier nul homme, signeur ne autre, ens es
chitéz, villez et castiaulx de Northombrelant, se il n’estoient hiretier des
lieux. Et li rois, s’il luy plaist, et my signeur de son conseil m’en poeent
excuser. Car bien savoient que vous estiéz en Escoce : si vous deussent avoir
reservé." "Comment," respondy ly dus, "contez de Nortombrelant, ditez vous que
il convenoit reservation sour moy, qui suy onclez dou roy et quy ay a garder pb 94 v