pb 66 v
de Bretaigne, qui pour le tamps se tenoit au Suseniot en la marce de Vennez, sy
s’acorda, mais che fu a dur, a che que ses gens en avoient fait, car bien savoient
que il ne pooit che faire sans avoir grant mautallent as Englés.
SHF 2-190 sync Quant li connissance vint au conte de Bouquighem et as Engléz que ly dus de
Bretaigne s’estoit accordéz au roy de Franche, si en furent moult courouchiet
et se contempterent moult mal de li, et dissent que il les avoit de ceulx, car
de commenchement il lez avoit mandéz et fait venir en Bretaigne, et onquez,
enssy que il deuist avoir fait, il n’estoit acquitéz envers eulx, pourquoy
il en tenoient mains de bien et de loiauté. Assés tost apriéz, li dus de Bretaigne
vint a Vennez deviers le conte et les barons, et leur remonstra couvertement
coment ses gens avoient tretiet et pourcaciet a Paris deviers le roy et ses
onclez tretiéz, les quelz ilz convenoit que il fesist et tenist, se il ne voloit
perdre son païs. Adont eut grandez parollez entre le conte de Bouquighem et
lez barons d’Engletiere d’une part, et le duc de Bretaigne, mais li dus s’umelioit
et escusoit ce qu’il pooit, car bien veoit et sentoit que il avoit en aucunez
manierez tort. Toutefois faire le convenoit que li Engléz partesissent hors
de Bretaigne. Adont fist li contez de Bouquighem a savoir parmy la citté de
Vennez que, se ses gens avoient riens acrut, on se traisist avant, on seroit
paiiet, et rendy as bourgois de Vennez lez cléz de la ville, et les remercia
de ce que il avoient fait. On delivra au conte et a ses gens pour leurs deniers
navire a Vennez, a Hainbon et a Camperlé, la ou il estoient logiet, et se party de
Vennez li contez de Bouquighem le XIe jour dou mois d’apvril, et toutez ses
banierez desploiéz en ordenance de bataille. Et vinrent enssi sus le havene
ou leurs nefs estoient, si entrerent dedens ordeneement et furent la ou ha
vene tout le jour a l’ancre. Et la vint ly dus de Bretaigne, messires Alains de la
Houssoie, li sirez de Montbouchier, messires Estienez Guion, messires Guillaumez de Tanne
gui, messires Joffrois de Karemiel et pluiseurs aultrez de son conseil, et envoiierent
deviers le conte qui estoit en sa nef, dire que ly dus volloit parler a luy. Ly contez n’y
volt miez venir, mais y envoiia le signeur de Latinier et messire Thumas de Persi.
Chil doi vinrent parler au duc de Bretaigne, et furent ensamble en parlement
bien III heurez, et fu ordonné des Engléz a leur departement que il feroient
tant deviers le conte que a l’autre jour ilz et ly dus aroient plus de par
lement ensamble, et revinrent sus cel estat en leur nef, et remonstre
rent tout ce au conte et quel cose il avoient trouvé ou duc de Bretaigne.
Quant che vint apriéz mienuit et ly flos revint, ly maronnier eurent
vent a volenté, si demanderent au conte quel cose il voloit faire. Ly pb 67 r