pb 62 r
entre moy et vous, et n’i estez point venus !" "Par ma foy," respondi li dus, "monsigneur,
je n’en ay peult autre cose faire, et vous dy que j’en ay esté trop durement cou
rouchiéz. Mais amender ne le pooie, car mes gens de ce païs, pour cose que je
aie sceu monstrer ne quelz aliancez que a leurs requestez il aient fait a vous, il
ne se sont volut traire avant pour aler au siege avoecquez vous devant Nantez,
et se tiennent tout pourveu suz les frontierez ly sirez de Cliçon, ly sirez de Dignant,
ly sirez de Laval, ly viscontez de Rohem et li sirez de Rochefort, pour garder les
entreez et issuez de Bretaigne, et tout cil qui s’estoient ahers et conjoint avoecques
moy, tant des chevaliers comme des prelas et dez bonnez villez, sont maintenant
tout rebelle, dont je suy trop grandement courouchiéz, quant vous me trouvéz,
et par leur coupe, en bourde. Se vous diray, monsigneur, que vous feréz. Il est a present
ou plain de l’ivier, que il fait froit et mauvais ostoiier. Vous venréz a Vennez, et
la tous tenréz tant c’a l’avril ou au may, et vous y rafresquirés, et je ordonne
ray ossi de vos gens, et passeront le tamps au mieulx que il poront, et de
toutez cez cosez nous nos revengerons a l’esté." Ly contez respondy: "Dieux y ait part !"
qui bien vei que il n’en pooit avoir autre cose. Si l’amena ly dus de Bretaigne
en Vennez, et, a l’entrer dedens, les gens de la ville furent aparilliet, qui se missent
en la presensse dou conte, et li dissent moult douchement et a nus chiéz: "Monsigneur,
pour la reverence de vostre haute signourie et l’onneur de vous, nous ne vous
mettons nul contredit a entrer en nostre ville, mais nous vollons, pour a
paissier le peuple, autrement vous ne seriéz pas bien asegur, que vous nous
juréz sus saintez evangillez, que, XV jours apriéz ce que vous en seréz requis,
vous vos partiréz de ceste ville et feréz partir lez vostrez, et ne nous feréz ne
consentiréz damage ne moleste." "Par ma foy," dist li contez de Bouquighem, "je le
vous jure enssy, et le vous tenray." En apriéz, lez signeurs fissent il ossi jurer
sus leurs fois et sus saintez evangillez de tenir le sierement que ly contez
avoit fait, et il s’i acorderent legierement, et faire leur convenoit, se il ne
voloient dormir as camps. Enssi fu li contez de Bouquighem logiéz en
la citté de Vennez, et sez corps en l’ostel dou duch, I bien plaissant castiel
qui siet dedens le ville et est nomméz La Motte, et tout cil de sa bataille furent
logiet en la ville et ens es fourbours. Et ly dus de Bretaigne s’en vint au Suse
niot, et la se tint, mais a le fois il venoit a Vennez veoir le conte, et avoient
parlement ensamble, et puis s’en retournoit de la ou il estoit partis. Ly sires
de Lattiniers, ly sirez de Fil Watier, messires Thumas de Persy, messires Thumas Trivéz
et ly avantgarde devoient estre logiet en le ville de Hainbon, mais onquez
on ne leur vault ouvrir lez portez, et les convint logier as camps et ens pb 62 v