pb 24 r
belle cose de eulx veoir entrer par ordenance a Brughez, et s’en vinrent ens
ou marchiet, et enssi comme il venoient, il s’ordonnoient et rengoient sus v
le place. Se tenoit Jehans Lyons I blanc baston en sa main.
SHF 2-115 sync Entre ceulz de Gaind et de Bruges furent la faitez aliancez, jureez et
convenanchiéz, que il devoient demorer toudis ly un dalléz l’autre
enssi comme bon ami et voisin. Et les pooient cil de Gaind semonre, mander,
avoir et mener avoec eulx partout ou il voloient aler. Assés tost apriés
que tout ly Gantois furent venu et rengiet sus le marchiet, Jehans
Lions et aucunez cappitainnes de ses gens monterent hault en la halle.
Et la fist on I banc depar le bonne ville de Gaind et I commandement
que cascuns se traisist a hostel bellement et doucement et se desarmast,
et ne fesist noise ne esmeutin, sus la teste a perdre, et que cescuns, selonc
se ordenance, fesist son ensaigne a son ostel et que nulz ne se logast l’un
sus l’autre ne fesist le maistre au logier, par quoy noise ne estris peuissent
mouvoir, et sus la teste, et que nulz ne presist riens de l’autruy que il
ne paiast tantos et sans delay, et tout sus la teste. Che banc fait, on
en fist I autre depar le ville de Brughez que cascuns et cascune receuist
bellement et doucement en ses hostelz les bonnez gens de Gaind et que on
leur amenistrast vivrez et pourveancez, selonc le fuer commun de la ville, ne
nulle cose ne fust rencierie ne que nulz n’esmeuist noise, debath ne esmeutin,
et toutez ces cosez sus la teste. Adont se retraissent cescuns as hostels, et
furent en cel estat chil de Gaind en Brugez II jours moult amiablement,
et se loiierent et obligierent ly un a l’autre moult grandement. Ches obliga
cions prisses et faitez, escriptez et seelleez, au tierch jour chil de Gaind se
partirent et s’en alerent deviers la ville dou Dan, ou on leur ouvri lez portez
tantos et sans dangier. Et y furent li Gantois requelliet moult courtoise
ment, et la sejournerent II jours. En che sejour, et moult soudainement,
prist une maladie a Jehan Lion, dont il fu tous enfléz. Et la propre nuit que
la maladie le prist, il avoit souppet en grant reviel avoecquez damoissellez
de la ville, pourquoi ly aucun voellent dire et maintenir que il fu la
enpuisonnéz. De chela je ne say riens, je n’en volroie pas parler trop
avant, mes je say bien que, a l’endemain que la maladie le prist, de nuit
il fu mis en une litiere et aportéz a Ardembourch. Il ne peut aler plus a
vant, et la morut, dont cil de Gaind furent mout courouchiet et trop
grandement desbareté. pb 24 v