pb 126 v
en Flandrez, il trouvrera le païs ouvert et aparilliet pour reposer, rafresquir
et demorer tant comme il luy plaira, luy et ses gens, et pour mener avoecquez
luy dou païx de Flandrez C mille hommez tous arméz. Mais oultre, ly païx
fait requeste que de CC mille viés escus que jadis Jakemez d’Artevelle
et lez bonne villez de Flandres presterent au roy Edouwart de boine memo
ire au siege de Tournay et ensieuant au siege de Calais, il lez voellent
ravoir, et est li intention des bonnez villez de Flandrez, anchois que les
aliancez passent oultre, que la somme que dit est soit misse avant, et, la ou
elle le sera, ly rois d’Engletiere et tout li sien pueent bien dire que il
sont amit as Flamens et que il ont entree a leur volenté en Flandres."
Quant li signeur eurent oy ceste parolle et requeste, il regarderent l’un
l’un l’autre et commenchierent ly aucun a sousrire. Adont parla li dus de Lan
clastre, et dist : "Biau signeur de Flandrez, vostre parolle demande bien a avoir
conseil, et vous vous retrairéz a Londrez, et li rois se consillera sur vos re
questez, et vous en responderons tellement que bien vous devera par raison
souffire." Chil Gantois respondirent : "Dieux y ait part !" Adont yssirent
il hors de la cambre, et li signeur dou conseil demorerent qui commench
ierent a rire entre eux et a dire : "Et ne avéz vous oy cez Flamens et
les requestez que il ont faitez? Il prient a estre consillié, conforté et aidié.
Et dient que il leur besongne, et se demandent avoec tout ce a avoir
nostre argent, ce n’est pas requeste raisonnable que nous paions et si aide
rons." Lors se departy li consaulx sans riens plus avant adont consillier.
Et assignerent journee de estre de rechief ensamble, et li Gantois s’en retour
nerent a Londrez. Et la se logierent et s’i tinrent un grant tamps. Car il
ne pooient estre respondu roy ne de son conseil. Car li conssaus d’Engle
tiere sus leurs requestez estoit en grant different et tenoient lez Fla
mens a orguilleux et presomptieux, quant il demandoient a ravoir
CC mille viés escus, si anchienne debte que de XL ans, onquez cose
ne chey si bien a point pour le roy de France, qui voloit venir sus
Flandrez, que ceste cose fist qui fu enssy demenee. Car, se ly Flament
n’euissent point demandé la somme des florins dessus dis et n’euissent
singullerement fors requis le roy d’Engletiere de confort et de aide,
ly rois d’Engletiere fust venus en Flandrez ou euist envoiiet sy poissan
ment que pour atendre a bataille, avoecquez l’aide des Flamens
qui estoient adont tout ensamble, la poissance dou plus grant
signeur dou monde, mais il ala tout autrement, dont il leur en pb 127 r