Online Froissart
Home  |  Navigate  |  Apparatus  |  Search  |  About the Edition  |  About the Project  |  Help
Facsimile mode    Settings    Browse  |  Collate      
Navigate | Close
Preferences
Amiens 486
Previous | Folio 3 r | Next
pb 3 rIII

bien ce voiaige et leur feray faire delivranche d’or
et d’argent tant qu’il vous serviront vollentiers."
Sour ce la bonne damme avoit ja priiet moult de
chevaliers bachelereux et aventureux qui li prommetoient
que tres vollentiers il yroient. Et ravivioit la
damme tout secretement sen affaire et ses pourveances.
Mais oncques si secretement ne le peult faire
ne rescripre as barons d’Engleterre que messirez
Hues li Despenssiers ne le seuuist. Lors se douta
que de force li roix de France ne le renvoist en
Engleterre. Si s’avisa que par dons il atrairoit si
le roy de France et son consseil qu’il n’aroient
nulle vollenté de la damme aidier ne lui porter
contraire. Dont envoya par messaigez secréz
et afaitiés de ce faire grant plentet d’or et d’argent
et jeuiaux rices et especiaux deviers le roy et
son plus privet consseil, et fist tant en brief
termine que li roix et tous ses conssaulx furent
ossi froit d’aidier la damme comme il avoient
estet en grant desir. Et brisa li roys tout ce
voiaige et deffendy sus a perdre le royaumme
qu’il ne fuist nulz qui avoecquez la roynne d’Engleterre
se meist a voie pour elle aidier a remettre
en Engleterre a main armee. Dont li pluiseurs
chevalier et bacheler du dit royaumme en furent
moult courouchiet et s’esmervillierent entre
yaux pourquoy si soudainnement li rois avoit
fait ceste deffensce et en murmurerent li
aucun et disent bien que ors et argens i estoit
esforcheement acourus d’Engleterre.
Encoires vous diray je se j’ay loisir de quoy
chilx messires Hues li Espenssiers s’avisa. Quant
il vit qu’il n’avoit garde dou roy de Franche
ne de ce costé, pour embellir et florir se mavaitié
et ratraire la roynne en Engleterre et remettre
en son dangier et dou roy son marit, il fist le
roy d’Engleterre escripre au Saint Pere en supliant
assés affectueusement que il volsist escripre
et mander au roy Charle de Franche que il lui
volsist renvoiier sa femme car il s’en voloit
acquiter a Dieu et au monde et que ce n’estoit
mie sa couppe que elle estoit partie de lui car
il ne li voulloit que toutte amour et bonne
loyaulté telle que on doit tenir en mariaige.
Avoecq ces lettrez que li dis messires Hues fist le
roy d’Engleterre escripre au pape et as cardinaus
en lui escusant, comme vous avés oy et en
correz par pluiseurs soubtieues voies qui cy
ne puevent mie estre touttes descriptez, il
envoya grant or et grant argent a pluiseurs
cardinaux et prelas les plus secrés et prochains
du pape et ossi messagiers sages et aussi les
ot bien ydonne et taillié de faire ce messaige.
Et mena tellement le pape par ses dons et par
ses fallasses qu’il contournerent dou tout la
roynne Ysabiel d’Engleterre et condempnerent en
son tort et misent le roy d’Engleterre et son conseil
a son droit. Et escripsi li papes par le conseil

d’aucuns cardinaulx qui del accord le dessus dit Espenssier
estoient, au roy Carlon de Franche que sour painne
et sentensce d’escumeniement il renvoyast sa serour
la roynne Ysabiel en Engleterre deviers le roy
son marit. Ces lettrez veues et aportees devers
le roy de Franche et par si especial messagier que
par l’evesque de Saintes en Poitau que li pappez
y envoiioit en legation, li roys fu durement
esmus sur sa sereur et dist qu’il n’el volloit
plus soustenir a l’encontre del Eglise. Et fist
dire a sa seur, car ja de grant temps ne parloit
il plus a elle, que elle widast tost et hastivement
son royaumme ou il l’en feroit widier a honte.
SHF 1A-8 sync Quant la roynne oÿ ces nouvellez si fu plus
desconfortee et esbahie que devant car elle se
veoit entrepiez et toutte arriere dou comfort
et l’ayde que elle quidoit avoir dou roy Carle
son frere, si ne seut que dire ne quel advis
prendre. Car ja l’eslongoient chil de Franche
par le coummandement dou roy et n’avoit
a nullui conseil ne retour fors seulement a son
chier cousin monseigneur Robert d’Artois, mez
chilx secretement le consseilloit et confortoit
che qu’il pooit, non a veue car il ne l’osast fere
pour le roy, qui deffensce y avoit mis et en quel
haynne et malivolensce la roynne estoit esceue,
dont moult li anoioit, et savoit bien que par
mal et par envie elle estoit ainssi decachie.
Si estoit chils messires Robiers d’Artois si bien
dou roy qu’il volloit; mes il ne l’en osoit parler.
Car il avoit oy dire le roy et jurer que chilx
qui l’em paroit, quelx qu’i fust, il lui torroit sa
terre et son royaumme. Si entendi il secretement
que li roys estoit en vollenté de faire prendre
sa soer, son fil, le comte de Cam et messire Rogier
de Mortemer et de remettre ens es mains
dou roy d’Engleterre et dou dit Espenssier. Et ensi
le vint il dire de nuit a le roynne d’Engleterre
et le avisa dou peril ou elle estoit. Dont fu la
damme moult esbahie et requist tout en plorant
conseil a monseigneur Robert d’Artois quel cose elle
poroit faire ne u traire a garant et a conseil:
"En non Dieu, damme," dist messires Robiers, "le
royaumme de Franche vous loe je bien a widier
et retraire deviers l’Empire. La a il pluiseurs
grans seigneurs qui bien aidier vous poroient
et par especial li comtes Guillaummes de Haynnau
et messirez Jehans de Haynnau ses frerez. Chil
doy sont grant seigneur, preudomme et loyaul,
cremu et redoubté de leurs ennemis, amés de
leurs amis et pourveu de grant sens et de parfaite
honneur, et croy bien que en yaux vous trouverés
toutte adrece de bon conseil. Car autrement
il ne le saroient ne voroient faire." La damme
s’aresta sur cest avis et se reconforta I petit
a le parolle et priieire monseigneur Robert
d’Artois et fist appareiller touttez sez besoignes
et paiier et delivrer as hostelx au plus coiement pb 3 v