Online Froissart
Edition mode    Settings    Browse  |  Collate      

pb 286 vLe roy Dampietre crut ce conseil et se partis au plus tost qu’il pot et se retraist devers Nantueil. Si y vint si a point que il trouva les portes ouvertes du chastel et le sire qui le receut liement, lui XIIe tant seulement. Ce pendant se combatoient les aultre qui estoient espars sur les ch champs et faisoient les aulcuns ce qu’ilz pouoient. Car les Sarrasins qui la estoient et qui point le païs ne congnossoient avoient aussi chier qu’ilz feussent mors que longuement chaciéz. Si se vendoient aussi les aussi aultres. Les nouvelles vindrent au roy Henry et a messire Bertran du Guesclin que le roy Dampietre estoit retraiz et enclos ou chastel de Nantueil et que le Begue de Villaines et sa route l’avoient poursuivi jusques la, et si n’y avoit ou dit chastel que ung tout seul pas par ou on y entroit et yssoit, et devant celle entree se tenoit le Becgue de Villaines dessus dit et avoit la mis son pennon. De ce nouvelles fut durement resjouy le dit roy Henry et si fut messire Bertrand du Guesclin. Et se trahirent tous celle part en combatant et occiant gens a effort et a mort ainsi que bestes, et estoient tous lasséz de occire et de decopper et abatre. Si dura ceste chace plus de trois grans lieues et y ot ce jour mort plus de XVM que ungs que aultres, trop petit s’en sauverent se ce n’estoient ceulx du païs qui sçavoient les reffuges et les adresses pour eulx fouir et sauver. Car bien veoient que nul recouvrier n’y avoit et que tous estoient desconfiz et mors. Ceste bataille qui fut merveilleusement grande fut au dessoubz de Nantueil et la environ en Espaigne le XIIIe jour du moy d’aoust l’an de grace Nostre Seigneur mil trois cens soixante et huit.

SHF 1-599 sync Comment le roy dam Pietre fut priz et mis a mort et le roy Henry demoura roy de Castille, et la fourme d’aulcune lettres touchans le roy de France et le roy d’Angleterre. Et le conseil que les prelatz et aultres seigneurs donnerent au roy Charles de faire guerre au roy d’Angleterre.

Aprés ceste desconfiture qui fut durement grande sur le roy Dampietre et ses assemblees asséz pres de Nantueil et que le roy Henry et messire Bertran du Guesclin orent obtenu la place devant le dit chastel de Nantueil ou estoit le dit roy Dampietre, et bien disoient que ilz n’avoient riens fait ne exploictié s’ilz ne prenoient le dit chastel de Nantueil et le roy Dampietre dessus dit qui estoit dedens, si manderent tout leur estat et gouvernement a leurs gens qui estoient devant Tollete afin qu’ilz en feussent plus reconfortéz. De ces nouvelles furent moult resjoiz le conte dan Tille et le conte Sanses et tous ceulx qui la le siege tenoient. Le chastel de Nantueil pb 287 r