pb 9 rAussi en France ont ilz trouvé bonne chevalerie, roide, forte et aperte et grant foison. Car le royaume de France ne fu onques si desconfit que on n’y trouvast bien tousjours a qui combatre. Et fu le noble roy Phelippe de Valois un treshardy et bachelereux chevalier, et le roy Jehan, son filz, Charles, le roy de Behaingne, le conte d’Alençon, le conte de Fois, messire Saintré, messire Ernoul d’Andrehen, messire Bouciquaut, messire Guichart d’Angle, messire de Biaugeu, le pere et le filz et plusieurs autres que je ne puis maintenant tous nommer et qui bien seront en temps et en lieu ramenteuz. Car pour verité dire et soustenir on doit bien tenir pour asséz preux tous ceulz qui en si crueueses batailles et si perilleuses ont esté veüz et demeurent jusquez a la desconfiture souffisanment faisant leur devoir.
SHF 1A-1 sync Ci parle d’aucuns predecesseurs du roy Edouart d’Engleterre. Le IIIe chapitre.Premierement pour mieulx entrer en la matiere de l’onnorable et plaisant histoire du noble roy Edouart d’Engleterre, qui fu couronné a Londres, l’an de Grace mil CCC XXVI, que ce gentil roy fu couronné en Engleterre le jour de Noel, au vivant du roy son pere et de la royne sa mere. Certaine chose est que l’oppinion des Englois communement est telle, et l’a on veü souvent avenir en Engleterre, puis le temps le gentil roy Artus, que entre deux vaillans roys d’Engleterre a tousjours eu un moins souffisant de sens et de prouesce et asséz apparant est par le roy Edouart dont je parloie maintenant. Car vray est que son ayeul que on appella le bon roy Edouart, fu moult vaillant, sage preudomme, hardy et tres entreprenant et bien fortuné en fais de guerres, et eut moult a faire contre les Escos et les conquist III fois ou IIII et ne peurent onques les Escoz avoir victoire ne durer contre lui. Et quant il fu trespassé, son filz de son premier mariage, qui fu pere au gentil roy Edouart, fu couronné aprés lui, qui point ne le resembla de sens ne de prouesce, ains gouverna et maintint son royaume moult sauvagement par le conseil d’autrui, dont puis il lui meschey moult laidement, si comme vous pourréz oir cy aprés s’il vous plaist, car asséz tost aprés ce qu’il fu couronné, le roy Robert de Breux, qui estoit roy d’Escoce, qui avoit tant et si souvent donné a faire au bon roy Edouart dessus dit que on le tenoit pour bien preux, reconquist toute Escoce et la bonne cité de Bervich avec, et ardy et gasta grant partie du royaume d’Engleterre IIII journees ou V dedens le paÿs par II fois et desconfist le roy et tous les barons d’Engleterre, en un lieu en Escoce que on appelle Estrumelin, par bataille rengee et arrestee. Et dura la chace de ceste desconfiture par deux jours et par II nuis et s’en afuy le roy d’Engleterre a moult pou de ses gens jusques a Londres. Mais pour ce que ce n’est mie de nostre matiere, je m’en tairay a tant.
SHF 1A-2 sync Cy fait mention des parens du roy Edouart d’Engleterre. Le IIIIe chapitre.Le roy qui fut pere a ce gentil roy Eduart, avoit deux freres de remariage, desquelx l’un estoit appellé le conte Marescaux, et estoit de moult sauvage et diverse maniere. L’autre avoit nom messire Aymes et estoit conte de Cain. Moult estoit cil preudomme, doulz et debonnaires, et bien améz de bonnes gens. Ce roy estoit marié a la fille le beau roy Phelippe de France, qui estoit une des plus belles dames du monde. Il eut de ceste dame II filz et II filles. Desquelx filz le premier est le gentil et le preux roy Edouart d’Engleterre de qui ceste histoire est commencee. L’autre eut nom Jehan et mouru asséz joenne. L’ainsnee fille des II filles eut nom Ysabel, et fu mariee au joenne roy David, roy d’Escoce, filz du roy Robert de Breux. Et lui fu donnee en mariage en joennesse par l’accort pb 9 v