Afin que honorables avenues et nobles aventures faiz d’armes par les guerres de France et d’Engleterre soient notablement registréz et miz en memoire perpetuel, par quoy les preux aient exemple de eulz encouragier en bien faisant, je vueil traitier et recorder l’istoire et matiere de grant louenge. Mais ains que je la commence, je requier au Sauveur de tout le monde, qui de neant crea toutes choses, qu’Il vueille creer et mettre en moy sens et entendement, si vertueux que ce livre, que j’ay commencié, je le puisse continuer et perseverer en tele maniere que tous ceulx et celles qui le liront, verront et orront, y puissent prendre esbatement et plaisance et je encheoir en leur grace. On dist, et vray est, que tous edefices sont maçonnéz et ouvréz l’une pierre aprés l’autre, et toutes grosses rivieres sont faites et rassemblees lieux et plusieurs sourgons, aussi les sciences sont estraites et compilees de plusieurs clers. Et ce que l’un ne scet, l’autre scet, nonpourquant rien n’est qui ne soit sceu ou loing ou pres, dont aussi pour attaindre et venir a la matiere que j’ay empriz de commencier, premierement par la grace de Dieu et de la Benoite Vierge Marie, tout confort et avancement viennent, je me vueil fonder et ordonner sur les vrayes croniques jadis faites et rassemblees par reverend homme et discret seigneur, monseigneur Jehan le Bel, chanoine de Saint Lambert de Liege, qui grant cure et toute bonne diligence mist en ceste matiere et la continua tout son vivant au plus justement qu’il peut et moult lui cousta a l’aquerre et a l’avoir. Mais quel fres qu’il y eust, ne feist riens ne les plaingni. Car il estoit riche et puissant, si les pouoit bien porter. Et estoit de soy meismes larges, honnorable et courtois et voulentiers veoit le sien despendre. Aussi il fu en son venir moult ami et secret a tresnoble et doubté seigneur monseigneur Jehan de Haynau, qui bien est ramenteuz et de raison en ce livre. Car de moult nobles et belles avenues il en pb 8 v