pb 34 vSi trouverent d’aventure le guichet ouvert. Adont descendirent ilz, monseigneur Gautier tout devant et aucuns des compaignons, et entrerent en la porte tout quoiement et establirent aucuns des leurs pour garder la porte. Puis vindrent tout contreval la rue monseigneur Gautier et son pennon tout devant devers la grosse tour et les chaingles. Mais la portes et le guichet estoient bien ferméz. Aussi la gaitte du chastel oÿ la frainte et les apparçut de sa garde, si commença a corner en sa buisine : "Trahi ! trahi !" Lors s’esveillierent toutes gens et les soudoiers du chastel. Mais point ne vuidierent de leur fort. Et dont monseigneur Gautier de Mauny se retrait arriere tout bellement. Mais il fist bouter le feu en la rue encontre le chastel, qui tantost se aluma et furent bien a ceste matinee LX maisons arses, et les gens de Mortaigne effrayéz car ilz cuidoient estre tous priz. Mais le sire de Mauny et sa compaignie, chevaucierent arriere devers Condet, et la passerent l’Escaut et la riviere de Haine. Puis chevaucierent le chemin de Valenciennes et la costierent a la droite main et vindrent a Denain et se refreschirent la en l’abbaie. Puis passerent oultre devers Bouchain et firent tant au chastellain que les portes leur furent ouvertes. Et la passerent la une riviere qui se refiere en l’Escaut, et vient d’amont devers Allues en Pailleul. Aprés s’en vindrent a un fort chastel qui se tenoit de l’evesque de Cambray et de Cambresis et l’appelle on Thun l’Evesque et siet sur l’Escaut. A ce chastel n’avoit adont nulle garde souffisant. Car le paÿs ne cuidoit pas estre en guerre, si furent tous ceulx de Thun soudainement surpriz et le chastel conquiz, et le chastellain et sa femme dedens. Et en fist le sire de Mauny une bonne garnision. Et y ordonna a demourer un sien frere chevalier, qui s’appelloit monseigneur Giles de Mauny. Lequel fist depuis a ceulx de Cambresis et a la cité de Cambray plusieurs destourbiers, car le chastel siet a une lieue pres de la dicte cité. Quant monseigneur Gautier de Mauni eut fait ses emprises, il retourna franchement en Braibant devers le roy son seigneur, qu’il trouva a Malines.
SHF 1-74 sync Comment aprés les deffiances, les gens du roy de France entrerent en Engleterre. XXXVIISitost que le roy Phelippe de France se senty deffié du roy englois et de ses aliés, il retint gens d’armes et soudoiers de tous léz. Si envoia monseigneur le Galois de la Baume, un bon chevalier de Savoie en la cité de Cambray et l’en fist cappitaine, avec monseigneur Thibaut de Maruel et le seigneur de Roye, et estoient bien tant Savoisiens comme François bien CC lances. Et si envoia le roy Phelippe saisir la conté de Pontieu, que le roy d’Engleterre avoit tenu en devant depar madame sa mere. Et manda et pria a aucuns seigneurs de l’Empire telz que le conte de Haynau, son nepveu, le duc de Lorraine, le conte de Bar, l’evesque de Més et l’evesque de Liege, qu’ilz ne feissent nul mauvais pourchas contre lui et a son royaume. Les plus de ces seigneurs lui respondirent que aussi ne feroient ilz. Et le conte de Haynau lui rescript moult courtoisement qu’il seroit appareillié a lui et son royaume aidier a garder contre tout homme. Mais se le roy d’Engleterre vouloit guerrier l’Empire comme vicaire et lieutenant de l’empereur, il ne lui pouoit refuser son paÿs ne son confort. Car il tient en partie sa terre de l’empereur. Sitost que messire Hue Kieré, messire Pierre Bahucés et Barbenaire, qui gardoient les destrois et les passages entre Engleterre et France, a grant navire, entendirent que les deffiances estoient faite entre France et Engleterre, pb 35 r