pb 28 ret conquiz tout le royaume d’Escoce. Et plusieurs fois fu il si dechacié qu’il ne trouvoit nullui en son royaume qui l’osast herbergier ne soustenir en chastel, ne en forteresse pour la doubtance de ce roy Edouart. Et quant le roy Edouart estoit arriere revenu en Engleterre, ce preux roy Robert rassembloit gens quelque part qu’il les peust trouver, et reconqueroit ses chasteaux, forteresses et bonnes villes jusques a Bervich, les unes par force et bataille, et les autres par beaux parlers et par amours. Et quant le roy Edouart le savoit, il en eut grant despit et faisoit semondre ses ostz et ne cessoit jusques a tant qu’il avoit desconfit et reconquiz le royaume d’Escoce comme devant. Ainsi avint entre ces deux roys, si comme je oÿ recorder que ce Robert reconquist son royaume V fois. Et ainsi se maintindrent ces II roys, que on tenoit a leur temps les II plus preux du monde, tant que le bon roy Edouart trespassa en la cité de Bervich. Et avant qu’il mourust, il fist appeller son ainsné filz, qui aprés lui fu roy, pardevant ses barons, et lui fist jurer sur sains que, sitost qu’il seroit trespassé, il le feroit boulir en une chaudiere tant que la chair se partiroit des os, et dont feroit la chair mettre en terre et garderoit les os, et touteffois que les Escos se reveleroient contre lui, il semonderoit ses gens et porteroit avec lui les os de son pere. Car il tenoit fermement que tant qu’il aroit ses os avec lui, les Escos n’aroient point victoire contre lui. Lequel n’acompli mie ce qu’il avoit juré, ains fist raporter son pere a Londres et la ensevelir, dont il lui meschei si comme vous avéz oy cy dessus.
SHF 1-54 sync Comment le roy Phelippe de France et plusieurs autres roys se croisierent. Le XXVIIe chapitre.En ce temps le roy Phelippe de France se party de Paris en grant arroy, le roy de Behaigne et le roy de Navarre en sa compaignie et foison de ducs, contes et seigneurs. Car il tenoit grant estat et noble, et faisoit grans livrees et grans despens. Et ala visitant son royaume parmy Bourgoingne, tant qu’il vint en Avignon, ou il fu moult solempnelment receu du pape Benedic et de tout le colliege, et l’onnourerent du plus qu’ilz peurent, et fu depuis grant terme la environ avec le Saint Pere et les cardinaulx, et se logoit a Villeneuve dehors Avignon. Si vint le roy d’Arragon aussi en ce temps a court de Rome pour lui veoir et festier. Si y eut grans festes et solempnitéz a leurs aprouchemens et furent la tout le Quaresme ensuivant, dont il avint que certaines nouvelles vindrent en court de Rome que les ennemiz Dieu estoient trop fort reveléz contre la Sainte Terre et avoient reconquiz presque tout le royaume de Rasse, et pris le roy, qui s’estoit de son temps crestienné, et fait mourir a grant martire. Et menaçoient encore les incredules grandement sainte Eglise et la crestienté. Le jour du bon Venredy prescha le pape, presens les roys nomméz, la digne souffrance de Nostre Seigneur et enorta grandement la croix a prendre pour aler sur Sarrazins, tant que le roy de France, meu en grant pitié, prist la croix et requist au pape qu’il lui voulsist accorder, et dont le pape lui accorda et conferma par condition qu’il absoloit de paine et de coulpe, vrays conféz et vrays repentans, le roy de France et tous ceulx qui iroient avec lui en ce saint voiage. Le roy Charles de Behaingne, le roy de Navarre et le roy Pierre d’Arragon la prindrent, et grant foison ducs, contes, barons et bons chevaliers qui la estoient, et aussi le cardinal de Napples, le cardinal de Pierregort, le cardinal Blanc et le cardinal d’Ostie. Si fu tantost celle croix preschiee et publiee pb 28 v