pb 27 rson grant ost qu’il entra en Escoce, et passa la riviere qui depart Engleterre et Escoce, et n’eut mie adont conseil de lui arrester devant Bervich mais de chevaucier avant et ardoir le paÿs si comme son ayeul avoit fait jadis. Si foula grandement en ceste chevaucee toute la Plaine Escoce, et exilla moult de villes fermees de fosséz et de paliz, et prist le fort chastel de Haindebourc et y mist gardiens depar lui, et passa la seconde riviere d’Escoce dessoubz Strumelin et coururent ses gens tout le paÿs de la environ jusques a Saint Jehanston et destruirent la bonne ville de Donfromelin. Mais ilz ne firent nul mal a l’abbaie car le roy le defendy, et conquistrent tout le paÿs jusques a Dondieu et jusques a Doubretan, un treffort chastel sur la marche de la Sauvage Escoce, ou le roy estoit retrait et la royne d’Escoce, sa femme, ne nulz n’aloit au devant des Englois. Mais s’estoient retrais dedens les forestz de Gedours, qui sont inhabitables pour ceulx qui ne congnoissent le paÿs, et avoient la atrait tout le leur et miz a sauveté, et ne faisoient compte du demourant. Ce n’estoit mie merveille s’ilz estoient esbahiz car leur sire n’avoit que XV ou XVI ans. Le conte de Moret estoit plus joenne, et un damoyseau qui s’appelloit Guillaume de Douglas, nepveu a cellui qui estoit demouré en Espaigne, de tel aage. Si que le royaume d’Escoce estoit tout despourveu de bons cappitaines. SHF 1-52 sync Quant le roy englois eut esté et sejourné, couru et chevaucié la Pleine Escoce et arresté ou paÿs le terme de VI mois et plus et il vit que nul ne venoit contre lui pour veer son emprise, il garny plusieurs chasteaux qu’il avoit conquis et s’avisa que par ceulx il guerrieroit le demourant. Puis se retrait tout bellement pardevers Bervich. Mais a son retour, il gaigna le chastel de Dalquest, qui est de l’eritage du conte de Douglas et siet a V lieues de Haindebourch, et y ordonna chastellain et bonnes gardes. Puis chevauça a petites journees tant qu’il vint a Bervich, la bonne cité qui est a l’entree d’Escoce et a l’issue du paÿs de Northombrelande, si l’environna le roy de tous poins et dist que jamais ne s’en partiroit si l’aroit a sa voulenté, ou que le roy d’Escoce le venist combatre et lever a force. Grant temps y demoura le roy avant qu’il la peust avoir car elle estoit bien fermee, et environnee d’un léz d’un bras de mer, et si avoit dedens bonnes gens en garnison depar le roy d’Escoce. Si eut pardevant la cité maint assaut, hustin et dure escarmuche et presque tous les jours. Car ceulx de la cité ne se vouloient mie rendre simplement, ains cuidoient tousjours esté secourus. Mais nul secours n’ay apparut. Vray est que aucuns chevaliers bachelereux d’Escoce chevauçoient a la fois et venoient par vespres et par adjournemens resveillier l’ost aux Englois. Mais petit y faisoient. Car l’ost des Englois estoit si souffisaument gardé que les Escos n’y pouoient entrer fors a leur dommage. Et y perdoient souvent de leurs gens. Quant ceulx de Bervich virent qu’ilz ne seroient confortéz de nul costé, et que vivres leur amenuisoient, et leur estoient clos les pas de mer et de terre, par quoy nulz ne leur en pouoient venir, si commencierent a traittier devers le roy englois qu’il leur voulsist accorder une treve a durer I mois et se dedens ce mois le roy David leur sire ou autre pour lui ne venoit la si fort qu’il levast le siege, ilz rendroient la cité sauves leurs vies et leurs biens et que les soudoiers qui dedens estoient, s’en pouoient aler s’ilz vouloient, en leur paÿs d’Escoce sans recevoir point de dommage. Ces traittiés ne furent mie sitost accordéz. Car le roy d’Engleterre pb 27 v