pb 66 rfroyé qui les mena droit a celle petite riviere dessus ditte qui tant est noire et parfonde et emvironnee de grans marétz. Dont quant ilz firent la venuz ilz ne porent passer ains les couvint retourner devers le pont et tousjours chevauchoyent les Françoys les grans galoz devers le pont qui bien cuidoient ces coureurs allemans enclorre et par especial y mettoit le sire de Montmorency grant peine et moult grant entente.

Quant les Françoys orent tant chevauchié que ilz furent presques au pont et ilz virent la grosse embusche qui la estoit au devant du pont qui la les attendoit en bon couvenant, s’ilz furent esmerveillés ce ne fait pas a demander et distrent entr’eulx : "Nous chaçons trop follement de legier pourrions plus perdre que gaingner." Lors retournerent les plusieurs et par especial la banniere du seigneur de Saint Saulieu et le seigneur aussy. Et messire Charles de Montmourency et sa banniere chevaucha tousjours avant ne oncques ne se voulst reculer ains s’en vint de grant couraige assembler aux Allemans. La y ot de premiere venue forte jouste et mains hommes reverséz d’un cousté et d’autre. Et ainsi qu’ilz assembloient les coureurs qui les avoient coustiéz les vindrent ferir dessoubz ele et se bouterent ens de plains eslais et de grant voulenté, et aussy les Françoys les receurent moult bien.

¶ Or vous diray d’une appartise d’armes dont messire Regnault de Scouvenor usa a l’assemblee et que on doit bien tenir a recommander a fait d’armes. Il qui adoncques estoit en la fleur de sa jeunesce fort chevalier et royde bien monté et armé pour la journee s’en vint assembler a la banniere du seigneur de Montmourency qu’il congnut bien et s’en vint esperonnant droit a cellui qui tenoit la banniere et tant qu’il trouva le seigneur de Montmourency qui estoit droittement dessoubz sa banniere bien monté sur un bon coursier l’espee ou poing en combatant a tous léz, car aussy estoit il fort chevalier et grant durement sy le fery a destre et mist son bras senestre au frain de son cheval et tant qu’il le tira sy fort en ferant le sien des esperons qu’il le mist hors de la bataille. Le sire de Montmourency qui bien se donna garde de ce tour se prinst a deffendre de premier vassaulment comme hardy et fort chevalier pour lui delivrer des mains du seigneur de Scouvenort et de ce peril et feroit moult grans coups de l’espee sur le bacinet et sur le dos du dit seigneur de Scouvenort qui estoit bien armé et brisoit les coups a la foiz et les recevoit moult vassaulment et tant fist finablement que le sire de Montmourency demoura son prisonnier et fut tiréz hors de la presse et creança prison, tandis que les autres se combatoient. La fut bon chevalier messire Ernoul Randerodene, messire Henry de Kakeren, messire Thielemans, Mastiens de Varsiers et Candreliers son frere, et messire Robert de Glennes et tant firent lors les Allemans et leur route qu’ilz obtindrent la place et prindrent bien IIIIXX prisonniers gentilzhommes dessoubz la banniere de messire Charles de Montmourency et puis rapb 66 v