pb 29 vSy fut le roy Phelippe infourmé et advisié de ses plus especiaulx et grans amys que s’il aloit ou voyaige d’oultre mer qu’il avoit entrepris il mettroit son royaulme en tres grant adventure et qu’il ne pouoit faire ne exploittier meilleur chose que de garder ses gens et ce qui sien estoit et qui devoit retourner a ses enffans. Sy se reffroidy grandement de celle croix emprinse et contremanda ceulx qui faisoient ses pourveances si grandes et sy grosses que merveilles estoit jusques a tant qu’il eust veü du quel pié le roy anglois clocheroit qui pas ne se reffroydoit de soy pourveoir et appareiller selon le conseil qui lui estoit baillié du conte de Haynault. Et fist asséz tost aprés ce qu’ilz furent retournéz en Angleterre ordonner et appareiller dix chevaliers banneréz et XL autres chevaliers jeunes bacheliers et les envoya a grans fraiz par deça la mer droit a Vallenciennes et l’evesque de Lincolle qui moult fut vaillant homme avecques eulx pour cause de traittier a ces seigneurs de l’Empire que le conte leur avoit nomméz et pour faire tout ce que il et messire Jehan son frere ordonneroient et conseilleroient. Quant ilz furent venuz a Valenciennes chascun regardoit au grant estat que ilz maintenoient sans riens espargner neant plus que le roy d’Angleterre s’il y feust en propre personne dont ilz acqueroyent grant honneur et grant renommee. Et sy avoit entr’eulx plusieurs bacheliers qui avoient chascun un oeil couvert de drap par quoy ilz n’en peussent veoir et disoit on que iceulx avoient voué entre dames que jamaiz ne verroyent que d’un oeil tant qu’ilz eussent faitte aucune prouesce d’armes de leurs corps ou royaulme de France laquelle chose ilz ne vouloient pas congnoistre a ceulx qui leur en demandoient dont chascun avoit grant merveille.
¶ Quant ilz furent asséz festiéz et honnouréz a Valenciennes du conte de Haynault et de messire Jehan son frere des chevaliers et bourgoys du paÿs et des dames de Vallenciennes aussi, le dit evecque et la plus grant partie d’eulx se trairent pardevers le duc de Braibant par le conseil du conte de Haynault. Sy les festia le duc moult bien, car bien le savoit faire et puis s’accorderent si bellement qu’il ot en couvent de soustenir le roy anglois son cousin et toutes ses gens et son paÿs, car c’estoit son cousin germain. Sy pouoit venir et aler arméz et desarméz touteffoiz qu’il lui plairoit, et avecques ce il leur ot en couvent parmy certaine somme d’argent se le roy anglois vouloit entrer a force en France et deffier le roy puisqu’il peust avoir l’accord de ses seigneurs d’Allemaigne dessuz diz et leur ayde il le deffieroit aussy et yroit avecques luy atout mul armeures de fer. Ainsi leur ot en couvenant par sa creance de quoy il chancella et detria depuis asséz si comme vous orréz ça avant en l’istoyre.
SHF 1-58 sync¶ Adoncques furent ces seigneurs d’Angleterre moult ayses, car bien leur sembla que grandement ilz avoient besoingné tant comme au duc. Sy retournerent a Vallenciennes et firent tant par leurs messaiges, par leur or et par leur argent que le duc de Guerles serourge au dit roy angloys, le marquis de Juilliers pour luy et pour l’arcevesque de Couloingne Wallerent son frere et le sire de Fauquemont vindrent a Valenciennes parler a eulx par devant le conte de Haynault et messire Jehan son frere et exploittierent si bien devers eulx parmy grandes sommes de flourins que pb 31 r