pb 27 ravoit fait. Sy exploitta tant en ceste ordonnance qu’il foula grandement la Plaine Escoce et ardi et exilla moult de villes fermees de fosséz et de pallis et prinst le fort chastel de Handebourch et y mist gens et gardiens depar lui et passa la seconde riviere de Strumelin et coururent ses gens tout le paÿs de la environ jusques a Saint Jehanscon et assiegerent la bonne ville de Strumelin et l’esxillierent mais ilz ne firent nul mal a l’abbaye car le roy le deffendi et conquistrent tout le paÿs jusques a Dondieu et jusques a Doubretan, un tres fort chastel sur la marche de la sauvaige Escoce ou le roy estoit retrait et la royne sa femme ne nul n’aloit au devant des Angloys, ains s’estoient mis et retraiz tous dedens les forestz de Gedours qui sont inhabitables pour ceulx qui ne congnoissent le paÿs, et avoient la retrait tout le leur et mis a sauveté et ne faisoient nul compte du demourant. Ce n’estoit mie merveille s’ilz estoient esbahis et fuioient devant les Anglois, car ilz n’avoient nul bon cappitaine comme ilz avoient eu du temps passé.
¶ Premierement le roy David, leur sire estoit jeune d’aage de XV ou XVI ans, le conte de Mouret encores plus jeune et un damoiseau nommé Guillaume de Douglas nepveu a celluy qui estoit demouré en Espaigne de tel aage. Siques, le paÿs et tout le royaulme estoit despourveu de bon conseil pour resister aux Angloys qui adoncques estoient sy puissamment entréz en Escoce par quoy toute la Plaine Escoce fut courue, arse et gastee et plusieurs bons chasteaulx prins et conquis, lesquelz le roy angloys tint pour luy et penssa que par yceulx il guerrieroit le demourant et constraindroit ses ennemis du leur meismes.
SHF 1-52 sync¶ Quant le roy anglois ot
couru et chevauchié toute la toute la Plaine Escoce et arresté
ou paÿs par l’espace de six moys et plus et vit que nul ne venoit contre
lui pour veoir son emprise il se retray tout bellement pardevers Bervich,
mais a son retour il gaingna le chastel d’Alquest qui estoit de l’eritaige au conte de Douglas et est a VI lieues de Handebourc et
y ordonna chastellain et bonnes gardes pour le garder et puis chevaucha tant qu’il vint
devant la cité de Bervich. Sy l’assiega et environna le roy de toutes pars disans que jamaiz n’en partiroit. Si l’auroit mise a sa voulenté se le roy d’Escoce ne le venoit combatre et lever par force. Sy se tint le roy devant Bervich moult long temps devant ce qu’il la peust oncques avoir, car la cité estoit durement forte et bien fermee d’un bras de mer. Et si y avoit dedens
bonnes gens en garnison depar le roy d’Escoce pour la deffendre et pour
conseiller les bourgoys de la ditte cité. Sy y ot ce terme durant que le roy
y fist maint assault et maintes dures escarmousches et maintes appertises d’armes
presques tous les jours. Car ceulx de dedens ne se vouloient mie rendre simplement et
cuidoient tousjours estre confortéz mais nul apparant n’en fut. Bien est vray que aucuns
preux chevaliers et bacheliers d’Escoce chevauchierent plusieurs foys
et venoient par vesprees et par adjournemens resveiller l’ost des Angloys
mais petit y faisoient. Car l’ost du roy angloys estoit souffisamment gardé par
sy que les Escocs n’y pouoient entrer fors a leur grant dommaige et
souvent perdoient de leurs gens.
¶ Quant ceulx de Bervich virent que ilz n’estoient aydiéz ne secouruz de nul cousté et que le roy angloys ne parpb 27 v