Les Flamens se partirent un jour a heure de soupper de Cassel en entencion que pour desconfire le roy et tout son ost. Ilz s’en vindrent tout paisiblement sans faire noise ordonnéz en trois batailles desquelles l’une s’en ala droit aux tentes du roy et orent presques le roy seurprins qui seoit au soupper et toutes ses gens aussi. L’autre bataille s’en ala droit aux tentes du roy de Behaigne et le trouverent presques en tel point et l’autre bataille s’en ala aux tentes droittement du conte de Haynault et l’eurent aussy presques surprins et le hasterent sy qu’a peine peurent ses gens estre arméz ne les gens de messire Jehan de Beaumont son frere et vindrent toutes ces trois batailles sy paisiblement jusques aux tentes que a grant meschief porent les seigneurs estre arméz ne leurs gens assembléz et eussent tous esté mors se Dieu ne les eust ainsi que par miracle secouruz et aydiéz mais par la grace de Dieu chascun d’iceulx desconfirent sa bataille si entierement et tous en une heure et en un point que oncques de tous Flamens il n’en eschappa nul et y fut leur cappitaine mort et sy ne sçot oncques nul de ces seigneurs nouvelles l’un de l’autre jusques a ce que ilz orent tout fait ne oncques de XVM Flamens qui la furent n’en recula un seul que tous ne feussent ou mors ou prins en trois mortelz batailles sans yssir de la place ou chascun commença qui fut l’an de Grace mil IIIC XXVIII, le jour de la Saint Berthelemy. Lors aprés ceste desconfiture vindrent les Françoys a Cassel et y mistrent les bannieres de France et se rendy la ville au roy et puis Yppre et tous ceulx de la chastellerie de Berghes et ceulx de Bruges ensuivant et receurent le conte Loÿs leur seigneur amiablement et paisiblement et lui jurerent foy et loyaulté a tousjours mais.
Quant le roy Phelippe de France ot remis le conte de Flandres en son paÿs et que tous lui orent juré feaulté et hommaige il departy ses gens et retourna chascun en son lieu et il s’en vint en France sejourner a Paris ou environ. Sy fut moult prisiéz et honnouréz de celle emprinse et du service qu’il avoit fait au conte Loÿs, son cousin. Sy demoura en grant prosperité et en grant honneur et grandement atout l’estat royal. Et n’y avoit oncques mais en France eu roy comme on disoit qui eust tenu pareil estat au roy Phelippe et faisoit faire tournoiz, joustes et esbatemens a moult grant planté.
¶ Or nous tairons un petit de lui et parlerons des ordonnances d’Angleterre et du gouvernement du roy.
SHF 1-43 sync Des jugemens que le roy d’Angleterre fist et comment il vint en France.Le jeune roy d’Angleterre se gouverna un grant temps comme vous avéz ouy par le conseil de sa mere du conte de Kent son oncle et de messire Rogier de Mortemer. Au derrain envie commença a naistre entre le conte de Kent et le seigneur de Mortemer, et monta depuis l’envie si hault que le dit de Mortemer ennorta tant le jeune roy et par le consentement de la royne sa mere que le dit conte de pb 22 v