pb 18 rdu roy tousjours criant et huant : "Douglas! Douglas!", et couppa deux ou trois cordes de la tente du roy puis se party a tant. Bien puet estre qu’il perdy de ses gens a soy retraire mais ce ne fut mie grantment et retourna arrieres devers ses compaignons en la montaigne. Depuis n’y ot riens fait mais toutes les nuiz les Anglois faysoient grans guaitz et fors que ilz se doubtoient d’estre resveilléz des Escocs qui avoient mis gardes et escoutes en certains lieux par quoy se ceulx sentissent ne ouyssent riens ilz le signiffiassent a l’ost et gisoient presques tous les seigneurs en leurs armeures et tous les jours y avoit des escarmousches et escarmouschoit qui escarmouschier vouloit. Sy en y avoit souvent de mors et de pris, de navréz, de bleciéz et de mesaisiéz des uns et des autres.
SHF 1-37 sync Comment les Escocs s’enfouyrent par nuit et des Angloys qui s’en retournerent en Angleterre et du mariaige du roy d’Angleterre a la fille du conte de Haynault.Le derrenier jour des XXII fut prins un chevalier d’Escoce a l’escarmousche qui moult enviz vouloit dire aux seigneurs d’Angleterre le couvenant des leurs si fut tant enquis et examiné que il dist que leurs souverains avoient entr’eulx accordé le matin que chascun feust arméz au vespre, et que chascun suivist la banniere de messire Guillaume de Douglas quelque part qu’il voulsist aler et que chascun le tenist en secret mais le chevalier ne savoit de certain qu’ilz avoient en pensé. Sur ce orent les seigneurs d’Angleterre conseil ensemble et advisierent que selon ces parolles les Escocs pourroient bien venir par nuit brisier et assaillir leur ost a deux costéz pour mettre a l’adventure de vivre ou de mourir, car plus ne pouoient endurer leur famine. Sy ordonnerent les Angloys entr’eulx trois batailles et se rengierent en trois pieces de terre devant leur logeys et firent grant foyson feux pour veoir plus cler entour eulx et firent demourer leurs garçons en leurs logeys pour garder leurs chevaulx. Sy se tindrent ainsi celle nuit tous arméz chascun dessoubz sa banniere ou son pennonceau si comme il estoit ordonné pour attendre l’adventure. Car ilz esperoient asséz bien selon les parolles du chevalier que les Escocs les resveilleroient ilz n’en avoient pour tant nul tallent. Ainçoys firent par autre ordonnance bien et saigement.
¶ Quant ce vint sur le point du jour deux trompettes d’Escoce s’embatirent sur l’un des guaitz qui guettoit aux champs sy furent prins et menéz devant les seigneurs du conseil du roy d’Angleterre et distrent : "Seigneurs que guaittiéz vous cy vous perdéz le temps, car sur l’adbandon de noz testes les Escocs s’en sont aléz des mienuit et sont ja quatre ou cinq lieues loing et nous emmenerent avecques eulx bien une lieue loing pour doubte que nous ne le vous nottiffiessions et puis nous donnerent congié de le vous venir dire." Et quant les Angloys ouyrent ce ilz orent conseil et entendirent bien qu’ilz estoient deceuz en leur cuidier et dirent que le chassier aprés les Escocs ne leur pouoit riens valoir car on ne les peust acconsuivre, et encores pour doubte de decevement les seigneurs retindrent les deux trompeurs tout quoys et les firent demourer deléz eulx et ne rompirent point leur ordonnance ne l’establispb 18 v