pb 12 ret vinrent en la court, et fissent venir avant tous les varlés et pages de ces chevaliers et esquiers de Hainnau qui partir devoient, et la avoient en I sach cent livres d’estrelins, monnoie d’Engleterre, car adont il n’estoit encores nulles nouvelles de nobles. Et qant chil varlet furent venut, li mestre d’ostel dissent tout hault en prenant le sac qui estoit de quir: "Tenéz entre vous, varlés des Hainnuiers qui partir devés, madame la roine vous donne cent livres d’estrelins: priiés pour lui." Tout ou en partie respondirent et dissent: "Dieux doinst a madame la roine bonne vie!" Se lor demora chils argens et le departirent entre euls a grant joie. Il en i ot auquns qui bien le garderent, ce que en lor pareçon en eschei, et en devinrent puis rice, pour mettre en bonne montepliance, et li aultre le jeuerent as dés, qui ne s’en savoient conment delivrer. Che disner fait et ces signeurs, chevaliers et esquiers de Hainnau servis en la fourme et maniere que je vous di et tous ces jeuiauls requelliés et mis en paniers et en bonne ordenance
pour le plus aise porter et sans froissier, il
prissent congiet de madame la roine, de son fil et dou conte de
Qent et les aconvoia jusques enmi la court a Eltem li sires de Biaumont, messires Jehans de Hainnau, et tout I et I prissent congiet a lui,
et il lor donna. Adont monterent ils et messires Thomas Wage
aussitos conme il fissent, et se departirent de Eltem et ja estoit tout tart
et vinrent jessir a Dardeforde, et a l’endemain a Rocestre
et au tier jour a Saint Thomas de Cantorbie, et fissent la
lor offrande au corps saint, et apriés disner il cevauchierent et vinrent a Douvres et tout partout estoient delivré depar les gens la roine. Qant il furent venu a Douvres, on lor pourveï vassiaus depar la roine. Il esqiperent lors chevaus et puis entrerent ens es vassiaus passagiers et la
prist messires Thomas Wage congiet a euls, et retourna deviers la roine et le trouva a son retour a Eltem et messire Jehan de Hainnau. Et li Hainnuier singlerent par mer, et furent tantos a Wissan. Pour ce temps il i avoit une tres bonne ville et sciet entre Boulongne et Calais. Et devés savoir que, avant que li Hainnuier issirent de Londres, il furent paiiet en deniers
apparilliés, ensi que convenance se porta au departir de Hainnau entre
la roine et euls, et si largement que tout s’en contenterent. Et retournerent en Hainnau tout fouci d’argent et de jeuiaulz et vinrent a Valenchiennes deviers le conte et la contesse, qui les veirent
volentiers, et lors recorderent des nouvelles d’Engleterre, et sus mains
de quatre mois orent il fait tout ce voiage. Nous retournerons a parler de
la roine d’Engleterre, et des ordenancez dou païs.
SHF 1R-20 sync
Gap: sampling