pb 99 rplusieurs seigneurs et de divers paÿs, de Gascongne, de Bayonne, de Bretaigne, de Flandres depar Artevelle son grant amy, et des marches d’Escoce. Aussi du seigneur de Ros et du seigneur de Persy, et de messire Edouart de Baillouel, cappitaine de Bervich, qui lui signifioyent que les Escocs tenoient asséz feblement les treves qui accordees avoyent esté l’annee passee entre eulz et les Angloys, et faisoient une grant assemblee et semonce, mais ilz ne savoient pas ou c’estoit a aler de certain. Aussi les souldoyers qu’il tenoit en Poittou, en Xantonge, en La Rochelle et en Bourdeloys lui escripsoient que les Françoys s’appareilloyent durement pour guerroier, car les trieves devoyent faillir entre France et en Angleterre qui avoient esté donnees a Arras, aprés le departement du siege de Tournay. Ainsi ot le roy bon mestier d’avoir bon avis et bon conseil, car moult de guerres lui apparoient de tous léz. Si en respondit ausdis messaiges bien et a point, et briefment vouloit, toutes choses mises jus, secourir et reconforter la contesse de Montfort. Donc pria il a son chier cousin messire Robert d’Artoys qu’il preist a sa voulenté des gens d’armes et des archiers, et se parteist d’Angleterre et se meist en mer pour arriver en Bretaigne avec la ditte contesse de Montfort. Le dit messire Robert lui accorda voulentiers et s’appareilla le plus tost qu’il pot, et fist la charge de gens d’armes et d’archiers et s’en vint a la ville de Hantonne sur la mer, et la furent un grant temps ainçoys qu’ilz eussent vent a leur voulenté. Si se partirent environ Pasques, puis entrerent en leurs vaysseaux et monterent sur mer. Donc avecques messire Robert d’Artoys estoyent des barons d’Angleterre, le conte de Salebrin,
¶le conte de Sufforch, le conte de Penebroch, le conte de Kenfort, le baron de Stanfort, le seigneur Despenssier et plusieurs autres. Or lairons un petit a parler d’eulx et parlerons du roy angloys, qui fist un grant mandement parmy son royaume pour estre aux Pasques en la cité de Bervich ou païs de Northomberlande, en entencion d’aler en Escoce et tout destruire le païs, je vous diray pour quelle raison.
SHF 1-183 syncEn ce temps que les parlemens estoyent a Londres des barons et seigneurs d’Angleterre dessus dis sur l’estat que vous avéz ouy, conseillierent les princes au roy, en bonne foy, considerees les grosses besoingnes qu’il avoit a faire, qu’il envoyast l’evesque de Lincolle a son serourge le roy d’Escoce, pour accorder une trieve ferme et estable, s’il pouoit, pour durer deux ou trois ans. Le roy a ce conseil s’accorda moult envis, et lui sembloit grant blasme de requerir son annemy de trieves, selon ce que on lui avoit de nouvel fait assavoir, mais le guerroieroit si fortement que lesdis Escocs seroient tous desirans de prendre trieves. Mais les seigneurs d’Angleterre lui distrent que, sauve sa grace, que non estoit, selon ce que autreffois il avoit gasté tout et qu’il avoit a pb 99 v