pb 96 rvaillans hommes ne gens d’armes deussent faire ne consentir telle cruaulté que de consentir a mettre a mort chevalliers pris en fais d’armes, pour guerre de seigneurs. Et se fait estoit, autres chevalliers et escuiers plusieurs le pourroyent bien comparer en semblable cas. Les autres seigneurs, qui la estoyent et oyrent les paroles, en avoyent grant pitié. Mais, pour prieres ne pour plusieurs bonnes raysons qu’ilz sceussent faire ne monstrer au dit messire Loÿs, ilz ne le pourent oster de son propos, qu’il ne convenist que les devant dis chevalliers ne feussent decoléz aprés disner, tant estoit le dit messire Loÿs courroucié et yréz sur eulx.
SHF 1-178 sync Comment la garnison de Hainbont yssy dehors et comment les deux chevalliers prisonniers angloiz furent rescoux par eulx.Toutes les paroles, demandes, requestes et responses qui furent dittes entre monseigneur Charles de Bloys et messire Loÿs pour occasion de ces deux chevaliers sçorent tantost messire Gaultier de Mauny et messire Almaury de Cliçon, par espies qui tousjours aloyent couvertement d’un ost en l’autre. Et aussi sçourent ilz toutes les paroles derrenierement dittes, quant ilz furent amenéz en la tante monseigneur Charles. Dont quant messire Gaultier de Mauny et messire Almaury de Cliçon ouyrent ces nouvelles et entendirent que c’estoit acertes, si en ourent grant pitié. Si appellerent aucuns de leurs compaignons et leur moustrerent le meschief de ces deux chevalliers, pour avoir conseil comment ilz se maintendroyent, et quelles choses ilz pourroyent faire. Puis commencierent a penser l’un ça, l’autre la, et n’en savoyent que penser ne que aviser. Au derrain, commença a parler le preux chevallier messire Gaultier de Mauny, et dist ainsi: "Seigneurs compaignons, ce seroit grant honneur pour nous se nous pouons sauver ces deux chevalliers. Et se nous nous en mettons en payne et en aventure, et nous faillons, si nous en sauroit le roy Edouart, nostre seigneur, tres bon gré. "
"¶Aussi feroyent tous preudes hommes qui ou temps a venir en orront parler, puis que nous en aurons fait nostre devoir. Si vous en diray mon advis, se vous avéz voulentéz de l’enteprendre. Car il me semble que on doit bien le corps aventurer pour les vies de deux si vaillans chevalliers sauver. J’ay advisé, s’il vous plaist, que nous nous armerons, et nous departirons en deux parties, dont l’une des pars ystra maintenant, ainsi que on disnera, par ceste porte et s’en yront les compaignons rengier et monstrer sur ces fosséz, pour esmouvoir l’ost et pour escarmouchier. "
¶ "Bien croy que tous ceulx de l’ost acourront celle part tantost. Vous, messire Almaury en seréz cappitaine, s’il vous plaist, et aréz avecques vous mil bons archiers pour les seurvenans detrier et faire derriere reculer. Et je prendray cent de noz compaignons et VC archiers, et ystrons par celle posterne d’autre part couvertement, et vendrons par derriere ferir en leurs logeys que nous trouverons wis. J’ay bien avecques moy telz gens qui scevent bien la voye aux tantes pb 96 v