pb 90 vcouvenoit les Angloys et les Bretons retraire tout bellement devers leurs forteresce. La peust on veoir d’une part et d’autre belles envayés, belles rescouces, beaux faiz d’armez et belles prouesses grant foyson, et sur tous autres en avoit le pris et le los messire Gaultier de Mauny. Aussi se maintindrent moult vassaument et vaillamment ses compaignons. Et quant ilz virent que temps fut de retraire, ilz se retrayrent tout bellement jusques a leurs fosséz, et la rendirent estals tous combatans les chevalliers, jusques a tant que leurs gens furent rentrés a sauveté. Mais sachiéz que les autres archiers qui point n’avoyent esté a abatre l’engin estoyent yssus et rangiéz sur les fosséz, et trayoyent si forment qu’ilz firent tous ceulx de l’ost reculer, qui ourent grant foyson d’ommes et de chevaulx mors et navréz.

¶ Quant ceulx de l’ost virent que leurs gens estoyent en bersal et qu’ilz perdoyent sans riens conquester, ilz firent leurs gens retraire a leurs logeys. Et quant tous furent retraiz, ceulx de la ville se retrayrent chascun en son hostel. Qui adoncques veyst la contesse descendre du chastel a grant chiere, et baisier messire Gaultier de Mauny et ses compaignons, les uns aprés les autres, deux ou trois, bien peust dire que c’estoit une vaillante dame.

L’andemain messire Loÿs d’Espaigne appella le viconte de Rohan, l’evesque de Leon, messire Hervy de Leon et le maistre des Gennevoys, pour avoir advis qu’ilz feroyent et comme ilz se maintendroient, car ilz veoyent la ville de Hambout forte, et le secours qui venu y estoit, et mesmement les archiers, qui tous les desconfisoyent, par quoy ilz ne veoyent ne tour ne voye par laquelle ilz peussent la riens conquester.

¶ Si s’accorderent tous ad ce qu’ilz se deslogeroyent l’andemain, et se retrayroyent vers le chastel d’Aulroy, la ou messire Charles de Bloys estoit assiege fait. Si qu’ilz, au bien matin, deffirent leurs logeys et se traystrent celle part, comme ordonné estoit. Ceulx de la ville firent grans cris et grans hus quant ilz les virent deslogier, et aucuns yssirent aprés eulz pour adventure trouver. Mais ilz furent rechaciéz arriere et perdirent de leurs compaignons, ainçoys qu’ilz peussent estre rentréz en la ville.

¶ Quant messire Loÿs d’Espaigne et toute sa charge de gens d’armes furent venuz en l’ost messire Charles de Bloys, il lui compta la rayson pourquoy ilz avoyent laissié le siege. Puis ordonnerent ilz entr’eulx par grant consideracion de conseil, que le dit messire Loÿs et ceulx qui estoyent venuz avecques lui yroyent assieigier la bonne ville de Dignant, qui n’estoit fermee fors d’eaue et de palis.

¶ Ainsi demoura la ville de Hambont en paix une grant piece, et fut confortee moult grandement.

¶ Le dit messire Loÿs s’en pb 91 r