pb 80 ren ourent tres grant faiz.

¶ Nonobstant ce, ilz firent desteller leurs chevaulx des charioz, et les chacierent dedens la porte.

¶ Adfin que, s’il advenoit chose que ceulx de l’ost obtenissent la place, qu’ilz ne peussent au moins remener les chars ne les pourveances si legierement.

¶ Quant les autres souldoyers de la citévirent le hustin, aucuns yssirent hors pour les aydier.

¶ Aussy firent plusieurs bourgoys pour aydier leurs parens. Ainsi multiplia tres durement le hustin, et en y ot tout plain de mors et de navréz d’un costé et d’autre, et grant foyson de bien deffendans et d’assaillans, et dura ce hustin moult longuement. Car tousjours croissoit la force de ceulx de l’ost. Car tousjours y survenoyent nouvelles gens.

¶ Au parderrain, messire Henry de Leon, qui estoit un des maistres conseilliers du conte de Montfort, qui bien s’estoit maintenu et moult bien avoit reconforté ses gens, quant il vit qu’a point estoit de retraire et qu’ilz pouoyent plus perdre au demourer que guaingner, il fist ses gens retraire au mieulx qu’il pot.

¶ Sy advint ainsi qu’ilz furent si pres suivy au retraire qu’il en y ot grant foyson de mors, et de pris bien deux cens, et plusieurs bourgoys de la cité, dont leurs peres, leurs meres, freres et amy furent fourment dolans et courrouciéz.

¶ Aussi fut le conte de Montfort, qui durement en blasma messire Hervy, pour courroux de ce qu’il les avoit fait si tost retraire et lui sembloit que par le retraire ses gens avoyent esté perduz, de quoy le dit messire Hervi fut durement melencolieux, et ne voult oncques puis venir au conseil du conte, se petit non, sy s’en esmerveilloyent plusieurs fourment pourquoy il ce faisoit.

Or advint ainsi que j’ay ouy recorder que aucuns bourgoys de la cité qui veoyent leurs biens destruire dedens et dehors, et avoyent leurs enffans et amys em prison, et se doubtoyent encores de pis, si parlerent ensemble tant qu’ilz furent d’accord de traittier a ces seigneurs de France couvertement, par quoy ilz peussent avoir paix et leurs enffans et amys quittes et delivrés qui estoyent en prison et tant traittierent couvertement que accorde leur fut qu’ilz auroyent leurs prisonniers quittes et delivrés, et ilz devoyent livrer l’une des portes ouverte pour entrer les seigneurs dedens le chastel, sans riens forfaire ailleurs en la cité, a corps ne a biens. Tout ainsi qu’il fut accordé fut fait. Car les seigneurs et ceulx qui vouldrent entrer dedens la cité en une matinee, par l’accord des bourgoys, et alerent droit au chastel ou au palays, et brisierent les huis et pristrent le conte de Montfort et le menerent hors de la cité en leurs tentes sy paysiblement qu’ilz ne forfirent riens ne a corps ne a biens a ceulx de la cité et vouloyent bien dire aucuns que ce fut fait de l’accord et consentement du chevallier messire Hervy de Leon, pour tant que le conte l’avoit ramponné, comme ouÿ avéz cy dessus.

Or ne sçay je pas, quoy qu’il en feust souspeçonnéz d’aucuns, se ce fut voir ou non, mais bien apparut en ce que depuis ce il fut tousjours de l’accord de messire Charles de pb 80 v