Quant il fut ouy et entendu, on lui respondit moult briefment, et dist on: "Vous diréz depar nous a celluy qui cy vous envoye que, en tel estat que nous avons ja tenu le conte jusques a ores, nous le tenrons de ça en avant, et lui ferons engaigier toute sa terre, et ainssi sera il guerroiés de tous costéz. Et quant bon nous semblera nous entrerons en Haynault si a point que nous parardrons le païs."
Ces parolles, ne plus ne moins, rapporta le sire de Maubuisson a messire Jehan de Haynault, qui l’attendoit la sur la riviere, lequel lui en rendi moult de grant mercys; lors s’en retourna arriere le gentil chevalier messire Jehan de Haynault devers son nepveu, et le trouva qu’il jouoit aux eschas au conte de Nammur, lequel se leva si tost qu’il vit son oncle, et lui demanda nouvelles. "Sire," dist il, "ad ce que je puis veoir, le roy de France et son conseil prennent grant plaisir en ce que vous sejournéz et demouréz cy a grans fraiz et a grans despens, et dient et vous mandent qu’ilz vous feront despendre, et engaigier toute vostre terre. Et toutes et quantes fois que bon leur semblera, ilz vous combatront et entreront en vostre païs, et non pas a vostre voulenté ne a vostre aise mais a la leur."
De ces responses fut le conte de Haynault moult courroucié, et dist qu’il n’en yroit mie ainsi.
SHF 1-113 syncNous nous tairons un petit a parler du duc de Normandie et du conte de Haynault, et parlerons du roy angloys, qui s’estoit mis sur la mer pour venir et arriver en Flandres, et de la venir en Haynault pour aidier au conte son serourge, pour guerroier les Françoys.
¶Ce fut le jour devant la vigille saint Jehan Baptiste, l’an mil trois cens et XL, qu’il nagoit par mer a belle charge de vaisseaulx, et estoit toute sa navie partie du havre de la Tamise, et s’en venoit droitement pour arriver a l’Escluse.
¶ Adoncques estoient entre Branquebarge et l’Escluse sur la mer messire Hue Kierés, messire Pierre Bahués et Barbenoire a plus de VIXX gros vaisseaulx sur les hoquebos. Et estoient bien tant de Normans, de Picars et de Bretons comme de Gennevoys, jusques a XLM, et la estoient encrés et arresaz au commandement du roy de France pour attendre la revenue du roy d’Angleterre, car bien sçavoient qu’ilz devoient par la rappasser. Si lui vouloient deffendre le passage, comme ilz firent bien et hardiement, tant comme ilz porent, comme vous orrés recorder.
Comment le navire du roy de France fut deconfiz par les Anglais.Le roy d’Angleterre resgarda et vit si grant quantité de vaisseaux qu’il sembloit ce feust un bois des mas et demanda que ce pouoit estre, si lui fut dit que c’estoit l’armee des Normans qui tant de dommages lui avoit fait et lors le roy respondi : "S’il plaist a Dieu et a saint George, nous les combatrons. " Si fist le roy ordonner ses vaisseaulx en maniere de la taille, et fist frontiere a tous coustés de ses archiers, si que entre II nefs d’archiers en y avoit pb 61 v