pb 58 vcomme en telle besoingne appartenoit. Si advint en celle mesme saison que souldoiers allemans, qui se tenoient depar l’evesque de Cambray en Malle Maison, a deux lieues pres du Chastel de Cambresien et marchissant d’autre part plus pres de Landrechiez, dont le sire de Poutelles, un appert chevalier, estoit cappitaine et gardien, car le conte de Blois, quoyqu’il en feust seigneur, l’avoit rendu au conte de Haynault pour tant qu’il estoit françois, et le conte le tenoit en sa main et le faisoit garder pour les François. Si avoient souvent le hutin ceulx de la Malle Maison a ceulx de Landrechiez, donc un jour saillirent ceulx de la Malle Maison les dessus diz Almans, bien arméz et bien montéz. Si vindrent courir devant la ville de Landrechiers entre les Hanuyers, qui la se tenoient. Donc s’armerent le sire de Pontelles et tous ses compaignons. Si monterent a cheval pour rescourre la proye que les Allemans en menoient en la Malle Maison.

¶Or estoit adoncques le sire de Pontelles tout devant, et le suivuoient ses gens, chascun qui mieulx pouoit. Il, qui estoit de grant voulenté plain, abaissa son glaive et escria aux François qu’ilz retournassent, car grant honte estoit de fouir; la avoit un escuier allemant appellé Alprest de Coulomgne, appert homme durement estoit, lequel fut tout honteulx quant il se vit ainsi chaciés. Si retourna franchement et abaissa son glaive et feri cheval des esperons, et s’adreça sur le seigneur de Pontelles, et le chevalier sur lui, tellement qu’il le fery sur sa targe un si grant horion que le glaive vola en pieces, mais l’Alemant le consuivi de son glaive roidement et poursuvy qui point ne brisa, ains lui perça la targe, ses plactez et l’auqueton, et lui entra dedens le corps et le poingny droit au cuer, si qu’il l’abati jus du cheval a terre mort. Donc vindrent ses compaignons et ses gens, qui s’arresterent sur lui. Et quant ilz le virent en tel parti, ilz le regreterent durement, puis assaillirent les François moult asprement, en contrevengant le seigneur de Pontelles, qui la gisoit navré a mort. Et si durement les assaillirent que Albrest et sa route furent desconfiz, mors et pris, pou en eschappa, et la proie rescousse et ramenee, et les prisonniers aussi, en Landrechies; mais le sire de Pontelles fut apporté mort, dont tous les compaignons furent courrouciéz.

Aprés la mort du sire de Pontelles, le sire de Floyon fut un grant temps gardien de la ville de Landrechiez, et couroit souvent sur ceulx de la Malle Maison et du Chastel en Cambresis et des forteresces voisines, qui ennemies leur estoient; ainsi couroient les Hanuyers un jour et les François l’autre. Si y avoit souvent des rencontres et des ruéz jus des uns et des autres. Car au voir dire telz besoingnes le requierent. Si estoit le païs de Haynault en grant tribulation et esmay, car une partie de leur païs estoit ars et exilliee. Et si sentoient encores le duc de Normandie estre sur les frontieres, et si ne sçavoient qu’il avoit en pensé, et si n’oyoient nulles nouvelles de leur seigneur le conte de Haynault. Bien est voir qu’il avoit esté en Angleterre, ou le roy et la baronnie honnouré l’avoient grandement, et avoient illecques faites grandes aliances et puis s’estoit party de la et alé en Allemaigne, devers l’empereur Louys de Baviere. C’estoit la cause pourquoy il sejournoit tant. D’autre part messire Jehan de Haynault estoit alé en Braibant et en Flandres. Et avoit monpb 59 r