pb 50 vde Tournay, de quoy les Flamens furent moult resjouiz, car bien leur sembla qu’ilz seroient fors et puissans pour aler la conquerre. Et s’elle estoit en la seignourie du roy anglois, de legier ilz recouvreroient Lisle, Douay et Bethune et toutes les appendences de la conté de Flandres. Encore fut la regardé par les consaulx des bonnes villes de Flandres, de Braibant et les diz seigneurs, que ilz leur vendroit tres grandement a point pour eulx se le païs de Haynault et le conte voulsissent estre en ce parlement. Mais le conte s’excusa si bellement et si sagement que le roy d’Angleterre et tous les seigneurs se tindrent pour contens. Sur cel estat demourerent les choses, et se departirent les seigneurs, et s’en rala chascun en son lieu. Et le roy anglois prist son cousin le duc de Braibant et s’en vint a Anviers. Madame la royne, sa famme, demoura a Gand, qui souvent estoit d’Artevelle et des seigneurs et des dames et des damoiselles de Gand bien acompaignié.
¶ Asséz tost aprés fut la navie du roy angloys appareilliee. Si monta en mer et la grigneur partie de ses gens, en entention de retourner en Angleterre, et de visiter le païs. Mais il laissa ou païs de Flandres deux contes, sages chevaliers et vaillans durement, pour tenir en amour les Flamens et pour mieulx remonstrer que leurs besoingnes estoient les siennes. Ce furent messire Guillaume de Montagu, conte de Sallebrin, et le conte de Sufforch. Ceulx s’en vindrent en la ville d’Ippre, et la ville les receut, et la tindrent leur garnison et la guerroioient tout l’iver moult souvent ceulx de Lisle et la environ. Et le roy anglois tant naga par mer qu’il arriva a Londres environ la Saint Andrieu, ou il fut moult conjoins de ceulx de son païs qui desiroient sa venue, car il n’y avoit esté de long temps. Si vindrent a lui les plaintes de la destruction de ses gens que les Normans et les Picars avoient faite de la bonne ville de Hantonne. Dont le roy anglois fut moult courroucié pour la destruction de ses gens, ce fut bien raison. Si les appaisa au plus bel qu’il pot, et leur dist que s’il venoit a tour, il leur feroit bien chier comparer, comme il fist en celle mesme annee, comme vous pourrés ouyr cy avant en l’istoire.
SHF 1-91 syncOr vous compterons du roy Phelippe de France, qui estoit retourné vers Paris et avoit donné congié a son grant ost. Il fist si durement renforcier sa grosse navie qu’il tenoit sur mer, dont messire Hue Kierés, Bahuchés et Barbenoire estoient cappitaines. Et tenoient ces maistres escumeurs grant foison de souldoiers genevois, normans, bretons et picars, et firent en cel yver plusieurs dommages aux Anglois. Et venoient courir jusques a Douvres, a Zandvich, a Wincestre, a Rue et la environ sur les costés d’Angleterre, et les doubtoient durement les Anglois. Car ceulx estoient si fors sur mer que plus de XLM souldoiers estoient en leur compaignie; siques nul ne pouoit issir d’Angleterre qu’il ne fust tantost pillié, desrobé et tout mis a mort. Si conquistrent ces souldoiers marins au roy de France, en cel yver, maints grans pillages. Et par especial conquistrent la belle et grosse navie appellee Christofle, toute chargee d’avoir et de laines que les Anglois tramettoient en Flandres, la quelle avoit cousté mains deniers a faire, et fut prise par les Normans. Dont les François en firent puis mains parlemens, comme ceulx qui moult resjouiz furent de cest conquest. Encores subtilloit et ymaginoit le roy nuit et jour comme il pourroit soy venger de ses ennemis, et par espicial de messire Jehan de Haynault, qui lui avoit, comme il estoit infourmé, fait pb 51 r