pb 25 vses compaignons en la montaigne. Depuis n’y ot rien fait, mais toutes les nuis les Anglois faisoient grans guetz et fors, que ilz se doubtoient d’estre reveislés des Escos qui avoient mis gardes et escoutes en certains lieux, pour quoy, se ceulx sentissent ne ouyssent riens, ilz le signifiassent a l’ost. Et gisoient presque tous les seigneurs en leurs armeures et tous les jours y avoit escarmouches, et escarmouchoit qui escarmoucher vouloit. Si en y avoit souvent de mors et de pris et de navrés et de bleciés et de mesaisiés des uns et des autres.

Le derrenier jour des XXII fut pris un chevalier d’Escoce a l’escarmouche qui moult envis vouloit dire aux Anglois le couvenant des leurs. Si fut tant enquis et examiné que il dist que leurs souverains avoient entr’eulx accordé le matin que chascun feust armé aux vespres. Et chascun suivist la banniere de messire Guillaume de Douglas quelque part que voulsist aler et que chascun le tenist en secret. Mais le chevalier ne sçavoit de certain qu’ilz avoient enpensé. Sur ce orent les seigneurs d’Angleterre conseil ensemble et adviserent que selon ces parolles les Escocs pourroient bien venir par nuit brisier et assailir leur ost a deux costés, pour mettre a l’aventure de vivre ou de mourir. Car plus ne pouoient endurer leur famine.

¶ Si ordonnerent les Anglois entr’eulx trois batailles et se rengierent en trois pieces de terre devant leurs logeis et firent grant foison de feux pour veoir plus cler entre eulx. Et firent demourer leurs varles en leurs logeis pour garder leurs chevaulx. Si se tindrent ainsi celle nuit tous armés, chascun desoubz sa banniere ou son pennonceau, si comme il estoit ordonné, pour attendre l’adventure. Car ilz esperoient assés bien selon les parolles du chevalier que les Escocs les reveilleroient. Ilz n’en avoient pour tant nul talant. Ainçois firent par autre ordonnance bien et sagement. Quant ce vint sur le point du jour, deux trompettes d’Escoce s’embatirent sur l’un des guets qui guettoit aux champs. Si furent pris et menéz devant les seigneurs du roy d’Angleterre et dirent: "Seigneurs, que guettés vous ycy? Vous perdés vostre temps. Car sur l’abandon de noz testes, les Escocs s’en sont aléz des mienuit et sont ja quatre ou cinq lieues loing. Et nous enmenerent avecques eulx bien une lieue loing pour doubte que nous ne le vous notiffiessions, et puis nous donnerent congié de le vous venir dire."

¶ Et quant les Anglois oirent ce, ilz orent conseil et entendirent bien qu’ilz estoient deceus en leur cuidier et distrent que le chacier aprés les Escocs ne leur pouoit riens valoir. Car on ne les peust aconsuivre. Et encore pour doubte de decevement les seigneurs retindrent les deux trompeurs tout quoy et les firent demourer delés eulx. Et ne rompirent point leur ordonnance ne l’establissement de leurs batailles jusques aprés prime. Et quant ilz virent que c’estoit verité et que les Escocs estoient partiz, ilz donnerent congié a tout homme de soy retraire a sa loge et de soy aisier. Et les seigneurs alerent a conseil pour regarder que on feroit.

¶ Entrementres aucuns compaignons anglois monterent a cheval et passerent la dite riviere en grant peril et vindrent dessus la montaigne donc les Escocs estoient la nuit partiz. Et trouverent plus de cinq cens bestez grasses toutes mortes que les Escocs avoient tuees pour ce qu’elles estoient pesans et ne les eussent peü suivir. Si ne les vouloient mie laissier vives aux Anglois. Et si trouverent plus pb 26 r