pb 22 vsitost que on orroit la trompette sonner, chascun meist ses selles et appareillast ses chevaulx. Et quant on orroit la seconde fois, que chascun s’armast et a la tierce fois que chascun montast sans targier et se traist a la banniere. Et que chascun preist sans plus un pain et le troussast derriere lui en guise de braguemar, et aussi que chascun laissast la endroit tous hernois, tout cherroy et toutes autres pourveances. Car on se combatroit l’andemain a quelque meschief que ce fust.

Ainsi que ordonne fut, il fut fait et fut chascun armé et monté a la droite mienuit. Pou en y ot de ceulx qui dormirent combien que on eust travaillié le jour. Car ainçois que les batailles fussent a leur droit ordonnees et assemblees commença le jour a apparoir. Lors commencierent les batailles et bannieres a chevauchier moult dispersement par bruieres, par montaignes, par valees et par bocaiges, malaisiés sans plain chemin. Et pardessus les montaignes et a plain des valees estoient croslieres et grans marés, si divers et si mauvais passages que merveilles estoit que chascun n’y demouroit. Car chascun chevauchoit tousjours avant sans attendre seigneurs ne compaignons. Et sachiéz que qui feust encrolléz en ces crolieres, il eust trouvé a malaise qui lui aidast. Et si demourerent grant foison de bannieres atout les chevaulx en plusieurs lieux et plusieurs sommiers et des chevaulx qui oncques puis n’en issirent. Et cria l’en moult ce jour a l’arme et disoit on que les premiers se combatoient aux ennemis. Siques chascun qui cuidoit que ce feust vray se hastoient quanqu’ilz pouoient parmi marés, parmy caillous, parmi vallees et montaignes, le heaume appareillié, et l’escu au col, le glaive ou l’espee ou poing sans attendre pere ne frere ne compaignon. Et quant on avoit ainsi couru d’une lieue ou plus et on venoit ou lieu ou le hutin et cri naissoit, on se trouvoit deceu. Car ce avoient esté serfs ou bisches ou autres bestes sauvaiges, de quoy il avoit grant foison en ce bois et en ces bruieres et en ce sauvaige païz, qui s’esmouvoient et fuioient devant ces bannieres et ces gens a cheval qui ainsi chevauchoient, et qui oncques ne les avoient veüz. Adonc huoit chascun aprés ses bestes et on cuidoit que ce feust autre chose.

Ainsi chevaucha le jeune roy anglois cellui jour parmmi ces montaignes et ces desers sans chemin tenir, sans voie, sans sentier et sans ville trouver fors par advis selon le soleil.

¶ Et quant ce vint a basses vespres que on fut venuz sus celle riviere de Thim, que les Escocs avoient passee, et leur convenoit rapasser, se disoient les Anglois. Et ilz furent la venuz si travailliéz et si fort menéz que chascun puet penser, ilz passerent oultre la riviere a gue moult a grant mesaise pour les grans pierres qui dedens gisoient. Et quant ilz furent passés chascun s’ala logier selon celle riviere ainsi qu’il pot et prendre terre. Mais ainçois qu’ilz eussent pris piece de terre pour eux logier, le souleil commença esconser. Et si avoit pou de ceulx qui eussent haiches ou congnees, ferrement ne instrument pour logier ne pour coupper bois. Et si en avoit plusieurs qui avoient perduz leurs compaignons et ne sçavoient qu’ilz estoient devenuz. S’ilz estoient en malaise, ce n’estoit pas de merveille. Et mesmement les gens de pié estoient demouréz derriere et si ne sçavoient en quel lieu ne a qui demander leur chemin, donc ilz estoient tous moult fort a malaises. Et disoient ceulx qui mieulx cuidoient congnoistre pb 23 r