Quant le jeune roy Edouart se senti ainsi deffiéz et son conseil aussi, ilz le firent a savoir par tout le royaulme et commander que tous nobles et non nobles feussent appareilliéz chascun selon son estat, et venist chascun a tout son pouoir au jour de l’Ascencion aprés ensuivant a Evruich, une bonne cité qui siet ou North. Et envoia devant grant foison de gens d’armes pour garder les frontieres pardevers Escoce. Et puis envoia grans messagiers pardevers messire Jehan de Haynault, en lui priant moult affectuesement qu’il le veust secourir et tenir compaignie a ce besoing, et qu’il voulsist estre vers lui a Evruich au jour de l’Ascencion, atout telle compaignie qu’il pourroit avoir de gens d’armes.
¶ Quant le sire de Beaumont oy ce mandement, il envoya ses lettres et ses messages par tout ou il cuidoit recouvrer de bons compaignons, en Flandres, en Haynault, en Braibant, en Hesbaing, et leur prioit si a certes qu’il pouoit que chascun le voulsist suivir, au mieulx monté et appareillié qu’il pourroit, devers Wissant, pour passer oultre en Angleterre. Chascun le suivi voulentiers selon son pouoir, ceulx qui furent mandéz et moult d’autres qui ne furent point mandéz, pour tant que chascun cuidoit apporter autant d’argent que les autres avoient apporté, qui avoient esté en l’autre chevauchee en Angleterre avecques lui. Siques avant que le sire de Beaumont venist a Wissant, il ot asséz plus de gens qu’il ne cuidoit avoir, mais tous les receut lieement et leur fist grant chiere. Quant il et sa compaignie furent venuz a Wissant, ilz trouverent les nefs et les vaisseaulx tous prests que on leur avoit amenéz d’Angleterre et mistrent dedens le plus tost qu’ilz pourent chevaulx et harnois, et passerent oultre et vindrent a Douvres. Et ne cesserent de chevauchier ne de errer de jour et de nuit tant qu’ilz vindrent, a trois jours pres de la Penthecouste, en la bonne cité de Evruich, ou le roy et madame sa mere estoient et grant planté de grans barons estoient, pour le jeune roy conseiller et accompaignier. Et attendoient la endroit la venue de monseigneur Jehan de Haynault et de sa compaingnie. Et aussi attendoient ilz que toutes les gens d’armes, les archiers et le communes des bonnes villes et des villages, feussent passéz oultre. Et ainsi qu’ilz venoient par grans routes, on les faisoit logier es villages a deux lieues pres ou III de Evruich, et la environ sur le plat païs, et les faisoit on oultrepasser pardevers les frontieres.
SHF 1-24 syncDroit a ce point vint a Evruich messire Jehan de Haynault dessus dit et sa compaignie. Si furent pb 19 r