Ainsi madame d’Angleterre la royne Ysabel de France trouva reconfort a messire Jehan de Haynault quant tout le monde lui faillit, et demoura a Valenciennes par l’espace de VIII jours deléz le bon conte et madame la contesse Jehanne de Valois. Et dementres fist elle appareillier son oeuvre et ses besoingnes. Et le dit messire Jehan de Haynault fist escripre moult affectuesement aux chevaliers et au compaignons de qui il se fioit le plus en Haynault, en Braibant en Besbaingne et leur prioit si a certes qu’il pouoit a chascun sur toute amistié qu’ilz venissent en ceste emprise. Si en y ot grant planté d’un païs et d’autre qui y alerent pour l’amur de lui et grant planté qui n’y alerent mie, combien qu’ilz en feussent priéz. Et mesmement le dit messire Jehan de Haynault en fut durement repris de son propre frere et d’aucuns de son propre conseil, pour ce qu’il leur sembloit que l’entreprise estoit si haulte et si perilleuse, selon les descors et les grandes haynes qui estoient adoncques entre les barons et les communes d’Angleterre, et selon ce que les Anglois sont communeement envieux sur toutes estranges gens quant ilz sont a leur dessus, especialment quant ilz sont en leur païs, que chascun avoit paour et doubte que le dit messire Jehan de Haynaut ne nul de ses compaignons peut jamais revenir. Mais quoy que on lui blamast ne desconseillast, le gentil chevalier ne s’en voult delaier, ainçois dist qu’il n’avoit que une mort a mourir qui estoit en la voulenté de Nostre Seigneur, mais il avoit promis a celle gentil dame la conduire jusques a son royaume. Si ne lui en fauldroit pour mourir. Et aussi chier avoit il a prendre la mort avec celle noble dame qui deschacee et desconfortee estoit hors de son païs, se mourir y devoit, comme autre part, car tous loyaulx chevaliers doivent aidier a leur loyal povoir toutes dames et pucelles deschacees et desconfortees a leur besoing, mesmement quant ilz sont requis.
Comment messire Jehan de Haynault prist congié a son frere, le conte de Haynaut, pour ramener la royne en Angleterre. XVI.Ainsi estoit meu et encouragié messire Jehan de Haynaut et faisoit sa semonce et priere des Hanuiers a estre a Halle, et les Braibançons a estre a Bredas. Et les Behaignons ou Mont Sainte Gertrux et les Hollandois, dont il y ot aucuns, a estre a Dourdrech. Lors prist congié la royne d’Angleterre au conte de Haynaut et a la contesse, et les remercia grandement et doulcement de l’onneur et de la feste, de la bonne chiere et belle recuillie faicte lui avoient. Et la baisa au partir le conte et la contesse et leurs beaux enffans.
SHF 1A-11 sync¶ Ainsi se parti la dame et son filz avec toute leur route, accompaigniéz de messire Jehan de Haynault, qui a grant pb 13 v