pb 120 rce que il avoit de compaignons et y fist mettre et mener, endementieres que ce traittié se faisoit, grant quantité de vins et des pourveances de la ville, et puis s’en cloirent laiens et disrent qu’ilz ne se rendroient mye ainsi.

¶ Or vindrent les dessus diz chevaliers au conte d’Erbi, et lui distrent comment les bourgoys de la Riolle se vouloient rendre, saufs leurs corps et leurs biens. Le conte demanda se le capitaine avoit esté a ces traictiés. Il respondirent que nennil, fors tant seulement les hommes de la ville. "Or aléz veoir", dist le conte aux chevaliers, "pourquoy il n’y est, et comment il se vuelt maintenir." Il distrent: "Sire, voulentiers." Lors retournerent arriere jusques aux barrieres et demanderent a ceulx de la ville "Le capitaine ou est il? Ne vuelt il point estreen vostre traictié?" Ilz respondirent "Nous ne parlons que de nous mesmes. Il fera a sa voulenté. Ja s’est il bouté ou chastel et monstré qu’il le vuelt tenir quoy que nous devenons anglois." Adont retournerent les chevaliers au conte d’Erbi et lui relaterent la besoingne ainsi qu’elle aloit.

¶ Quant le conte oÿ ce, si n’en fut mie moins pensif, et quant il ot pensé une espace, si dist: "Aléz, aléz, prenéz les a mercy, parmy tant qu’ilz vendrent sur les champs aporter les clefs. Car par la ville prendrons nous le chastel." Lors se departirent les dessus diz du dit conte et vindrent de rechief a ceulx de la Riolle et les receurent a mercy, parmy tant qu’ilz vindrent sur les champs aporter les clefs de la ville au conte d’Erby, et lui representerent en disant: "Chiers sires et honnourés, de ce jour en avant nous recongnoissons de ce jour en avant a estre voz feaulx et subgés et nous mettons du tout en l’obeissance du roy d’Angleterre." Ainsi devindrent hommes au roy d’Angleterre ceulx de la Riolle; avec tout ce, le conte d’Erbi leur fist jurer sur la teste qu’ilz ne conforteroient en riens ceulx du chastel de la Riolle, mais leurs seroient ennemis et les greveroient de tout leur pouoir. Ilz lui jurerent solempnelment par ainsi vindrent il a paix, et fist deffendre le conte sur la hart que nul ne feist mal a ceulx de la Riolle.

Ainsi ot le conte d’Erby la ville de la Riolle, mais le chastel se tenoit encores, qui bien estoit pourveu et garnis de bonnes gens et de bon capitaine et seur, et de grant artillerie. Si se traist le dit conte dedans la ville de la Riolle et y fist retraire toutes ses gens et environner le chastel et drecier pardevant tous ses engins qui nuit et jour gettoient contre les murs du dit chastel, mais trop petit l’empiroient, car ilz estoient haulx malement et de pierre moult dure, et ouvrés jadis par mains de Sarrazins, qui faisoient leurs souldures si fortes et les ouvraiges si estranges que ce n’est point comparaison a ceulx de maintenant.

¶ Quant le conte d’Erby et messire Gaultier de Mauny virent pb 120 v