pb 104 rdit roy atout bien XVC hommes d’armes et VIM archiers, et chevaucha tout ardant et exillant le païs d’un léz et d’autre. Et tant fist qu’il vint devant Rennes, ou il fut moult liement receu de ses gens, qui ja avoyent la sis un grant temps. Et quant il ot la esté environ cinq jours, il entendi que messire Charles de Blois estoit dedans la cité de Nantes, ou il faisoit son amas de gens d’armes. Si dist qu’il trairoit celle part. Si se party du siege, ou il y laissa ceulx que trouvéz il avoit, et tant chevaucha qu’il vint a tout son ost devant Nantes: si avant qu’il pot, car toute avironner ne la pot, tant est grant. Si coururent ses gens tout alentour, et gasterent durement le païs et prenoient vivres et pourveances par tout ou ilz les pouoient trouver. Et furent le dit roy et ses gens ordonnéz sur une montaigne hors de Nantes un jour, du matin jusques a nonne, par maniere de bataille, et cuidoient bien les dis Anglois que messire Charles et ses gens deussent yssir, mais non firent.
¶ Quant les Anglois virent ce, ilz se retrayrent en leurs logeys, mais leurs coureurs vindrent hors jusques aux barrieres, et a leur retour ilz ardirent les faulxbours.
SHF 1-195 sync Ainsi se tint le roy d’Angleterre devant Nantes, et et messire Charles estoit dedans, qui souvent escripsoit l’estat des Anglois devers le roy de France son oncle, et le duc de Normandie, qui le devoient conforter, car le dit duc en estoit chargié et s’estoit ja trai et venu en la cité d’Angiers, et la faisoit son amas de toutes manieres de gens d’armes, qui la venoyent de tous costéz. Entrementres que ces assemblees se faisoient, se tenoit le roy d’Angleterre devant Nantes, car il l’avoit assegee d’un costé et souvent y faisoit assaillir et escarmuchier, mais en tous ses assaulx petit y conquist. Ainçois y perdy par plusieurs fois de ses hommes. Quant il considera que par assault il n’y pouoit riens faire, et que messire Charles de Blois n’ystroit point aux champs, il s’avisa qu’il lairoit la la plus grant partie de ses gens asiegé, et se trairoit aultre part gastant le païs.
¶ Si ordonna le conte de Kenfort, le viconte de Beaumont, le seigneur de Persi, le sire de Ros, messire Jehan de Gobehen et plusieurs autres, a tenir la le siege atout VIC hommes d’armes et IIC archiers, et puis chevaucha au demourant de ses gens, tout ardant et exillant le bon païs de Bretaigne par avant lui, d’un costé et d’autre, tant qu’il vint devant la ville de Dignant, dont messire Pierre Portebeuf estoit cappitainne.
¶ Quant il fut venu a Dignant, il mist le siege tout environ et puis la fist fortement assaillir, et ceulx qui dedans estoyent entendirent aussi a eulx deffendre. Ainsi assega le roy d’Angleterre tout en pb 104 v