pb 100 ret tous fretéz, s’ancrerent sur la mer attendans leur venue. D’autre part messire Gaultier de Mauny et les seigneurs de Bretaigne qui dedans Hambouc se tenoient, estoyent durement esmerveilléz de leur contesse qui tant demouroit, ne ilz n’en oyoient aucunes nouvelles. Nonpourquant moult bien supposoient qu’elle ne sejournoit mie trop a son ayse, et ne doubtoyent autre chose fors d’aucun grief rencontre de ses annemys, pourquoy ilz ne savoient que penser.

Ainsi que messire Robert d’Artois et le conte de Penebruich, le conte de Salebrin et les autres seigneurs d’Angleterre nagoient par mer avec la ditte contesse et avoyent vent a souhet au departement de l’isle de Grece, a heure de relevee, ilz apparceurent la grosse navie des Gennevoys dont messire Loÿs d’Espaigne estoit chief. Si dirent lors lors les maronniers: "Seigneurs, arméz vous et ordonnéz, car vecy Gennevoiz et Espaignolz qui viennent et approuchent de nous." Lors sonnerent leurs trompes et mistrent leurs pennons avant armoyéz de saint George, et s’ordonnerent bien et sagement, et s’encloÿrent de leurs archiers, et puis nagerent a plain voile, ainsi que le temps l’apportoit et pouoient estre environ XLVI vaisseaulx, que grans que petis. Mais nul si grant ne si fort de trop n’en y avoit que messire Loÿs en avoit IX. Et entre ces IX avoit trois gallees qui se remoustroyent sur toutes les autres, et en chascune de ces trois gallees estoyent les trois corps de ces seigneurs, messire Loÿs, messire Charles et messire Othes. Si s’approucherent l’un des autres, et commencierent les Gennevoiz a traire de grant randon, et les archiers d’Angleterre a traire aussi sur eulz. La ot grant trait des uns aux autres et qui longuement dura, et mains hommes navréz et bleciéz. Et quant les seigneurs, barons et escuiers et chevaliers s’approucherent, et qu’ilz pourent des lances et espees ferir l’un l’autre. Adoncques y ot dure bataille et coueuse, et trop bien se porterent et approuverent les uns et les autres.

¶ La fut messire Robert d’Artoys tres bon chevalier, et la contesse de Montfort armee, qui bien valoit un homme, car elle avoit cueur de lyon, et tenoit un glaive moult royde et bien trenchant, et trop bien se combatoit et de grant couraige. D’autre part estoit messire Loÿs d’Espaigne en une autre gallee, comme bon chevalier, qui de grant cueur et voulenté requeroit ses ennemis, car moult les desiroit a se contrevangier du dommaige qu’il avoit eu en celle propre annee asséz pres de la et y fist grant foyson de belles appertises d’armes.

¶ Et gettoyent les Espaignolz et Gennevoiz qui estoyent en ces gros vaisseaux d’amont grans barreaux de fer et archegayes, dont ilz travailloient moult les Angloys. La ourent les barons et chevaliers angloys moult a faire, et trouverent l’armee des Espaignolz et des Gennevoiz moult forte et gens de tres grant voulenté. Si commença ceste bataille environ vespres, et la departy la nuyt. pb 100 v