Afin que honorables advenues et nobles aventures faittes d’armes, lesquelles sont avenues par les guerres de France et d’Angleterre, soient notablement registrees et mises en memoire perpetuel, par quoy les preux aient example d’eulz encouragier en bien faisant, je vueil traittier et recorder histoire et matere de grant loenge. Maiz ainz que je la commence, je requier au Sauveur de tout le monde, qui de neant crea toutes choses, qu’Il vueille creer et mettre en moy sens et entendement si vertueux que ce livre que j’ay commencié, je puisse continuer et perseverer en telle maniere que tous ceulx et celles qui le liront, verront et orront, y puissent prendre esbatement et plaisance et je escheoir en leur grace. On dit et voir est que tout ediffice est ouvré et maçonné, l’une pierre aprés l’autre et toutes grosses rivieres sont faittes et rassemblees de divers lieux et de pluseurs sourses. Aussi les sciences sont extraites et compillees de pluseurs clercz, et ce que l’un ne scet, l’autre scet. Nonpourquant riens n’est qui ne soit sceu, ou loing ou pres. Dont ainsi pour ataindre et venir a la matere que j’ay emprinse de pb 1 v