pb 5 v (vol. 1)qu’il estoit favourables au roi d’Escoce, il avoit tant conseilliet et tenu le roi d’Engleterre en
negligense que li Escot avoient reconquis le bonne cité de Bervich et ars IIII journees ou V par II fois dedens leur paÿs, et yaus desconfis en bataille et mis en cace, et porté tres grant damage. Et sus ce li dit baron d’Engleterre eurent pluiseurs fois parlement ensamble pour aviser et regarder qu’il en poroient faire, des quelz li contes Thumas de Lacastre estoit chiés et souverains. Et li desplaisoit li usages que li rois avoit empris, et en parla par II ou par III fois assés ouvertement au dit Despensier. Or, se perchut li dis messires Hues comment on murmuroit sur lui et sus son afaire, si se doubta trop fort que maulz ne l’en venist, ensi qu’il fist, mes che ne fu mies si trestos. Ançois eut il fait moult de coses damagables ou paÿs, si com vous orés chi aprés. SHF 1B-5 syncCilz qui estoit bien dou roy et si proçains qu’il voloit, et plus creüs tous seus que tous li mondes, s’en vint au roy et li dist que cil signeur avoient fait alliance encontre lui, et qu’il le metteroient hors de son royaume, se il ne s’en prendoit garde. Tant fist, par son enhort et par son soubtil pourcach, que li rois fist a I jour prendre tous ces signeurs a I parlement la ou
il estoient assamblé, et en fist decoler sans delay et sans cognissance de raison jusques a XXII des plus grans barons d’Engleterre, et tout premiers le conte Thumas de Lancastre, qui estoit ses oncles, preudons et sains homs, et fist puis moult de biaus miracles ou lieu ou il fu decolés. Pour le quel fait, li dis messires Hues acquist grant hayne de tout le paÿs, et par especial de la royne d’Engleterre et dou conte de Kent, qui estoit freres au dit roy. Encores ne se cessa pas li dis messires Hues de enhorter le roi mal a faire. Car, quant il perchut qu’il estoit mal de le royne et dou conte de Kent, il mist si grant descort entre le roy et le royne, par son malisce, que li rois ne voloit point venir en lieu ou elle fust, et dura cilz descors assés longement. Et fu qui dist a le royne et au conte de Kent tout secretement, pour les perilz eschiewer ou il estoient par le fait dou Despensier, que, se il demoroient longement ens pb 6 r (vol. 1)