pb 11 v (vol. 1)et messires li Despensiers li filz, qui estoient en ce fort chastiel enclos, et qui veoient leur meschief si grant qui leur couroit seure si apparamment. Et veoient tout le paÿs tourner avoecques le royne et avoecques son ainnet fil, et dreciet et esmeut encontre yaus. Dont, se il eurent dolour et paour et assés a penser, ce ne fait point a demander.
SHF 1-14 syncQuant la royne et tout li baron et li aultre furent herbergiet a leur aise, il assegierent le chastiel, au plus priés qu’il peurent. Et puis fist la royne ramener monsigneur Huon le Despensier le vielle et le conte d’Arondiel devant son ainsnet fil, et devant tous les barons qui la estoient, et leur dist que elle et ses filz leur feroient droit et loy et bon jugement, selonch leurs fais et leurs oeuvres. Adonc respondi messires Hues et dist: "Ha! dame, Diex nous voelle donner bon juge et bon jugement; et se nous ne le poons avoir en ce siecle, si le nous doinst en l’autre!" Adonc se leva messires Thumas Wage, bons chevaliers, sages et courtois qui estoit mareschaus de l’ost, et leur racompta tous leurs fais par escript, et tourna en droit sus un viel chevalier qui la estoit, afin qu’il raportast sus se feauté que a faire avoit de telz personnes par juge
ment, et de telz fais. Li chevaliers se consilla as autres barons et chevaliers, et raporta par plainne sieute que il avoient bien mort desservie, par pluiseurs horribles fais qu’il avoient la endroit oys racompter, et les tenoient pour vrais et tous clers. Et avoient desservi, par le diversité de leurs fais, a estre justiciés en trois manieres, c’est a savoir, premiers traynés et puis decolés, apriés pendus a un gibet. Tout en tel maniere qu’il furent jugiet, furent il tantost justiciet pardevant le chastiel de Bristo, veant le roy, et veant le dit monsigneur Huon le fil, et tous ceulz de laiens qui grant despit en eurent. Et puet cascuns savoir que il estoient a grant meschief de cuer. Ceste justice fu faite l’an de grasce mil trois cens vingt et six , le jour saint Denis, en octembre. SHF 1-15 syncApriés ce que ceste justice fu faite, si com vous avés oy, li rois et messires Hues li Despensiers, qui se veoient assegiet a tele angousse et a tel meschief, et ne savoient nul confort qui leur peuist la endroit de nulle part venir, se misent a une matinee, entre yaus deus, a peu de mesnie, en un petit batiel en mer, par derriere pb 12 r (vol. 1)