pb 10 v (vol. 1)sablon et sus le rivage de le mer sans havene et sans droit port. Si demorerent sus cel sablon par trois jours, a petit de pourveances de vivres, en descargant leurs chevaus et leurs harnas, et si ne savoient en quel endroit d’Engleterre il estoient arrivet, ou pooir d’amis ou d’anemis. Au quatrime jour, il se misent a le voie, a l’aventure de Dieu, comme cil qui avoient eu toute mesaise de fain et de froit par nuis, avoecques les grandes paours qu’il avoient ewes et avoient encores. Si chevaucierent tant amont et aval qu’il trouverent aucuns petis hamelés, et puis apriés si trouverent une grande abeye de noirs monnes, que on claimme Saint Aymon. Si se herbergierent et rafreschirent en ceste abbeye III jours. Et fisent penser de leurs chevaus bien et fort, car il en pensoient temprement avoir a faire.
SHF 1-12 sync
Nouvelles s’espandirent par le paÿs tant que elles parvinrent a ceulz par qui et seureté et mandement la ditte dame estoit rapassee. Si se apparillierent, dou plus tost qu’il peurent, de venir vers li et vers son fil qui il voloient avoir a signeur. Et li premiers qui vint encontre lui et qui plus grant confort donna a chiaus qui estoient venu avoecques lui, che fu li
contes
Henris de Lancastre au Tors Col, qui fu freres au conte Thumas de Lancastre
qui fu decolés, si com vous avés oy par dessus, et fu peres au duch de
Lancastre qui fu si bons chevaliers et si recommendés, si com vous porés oir en
ceste hystore, ains que vous venés a le conclusion. Chilz contes Henris de
Lancastre dessus dis vint a grant compagnie de gens d’armes. Apriés, tant d’uns et
d’autres vinrent contes barons, chevaliers et escuiers, atout gens d’armes, qu’il leur sambla
bien qu’il fuissent hors de tous perils. Et tous les jours croissoient gens d’armes, ensi qu’il
aloient avant.
Si eurent conseil entre yaus madame la royne, et li baron, cheva
lier et
escuier, qui venu estoient encontre li, que il iroient drois a Bristo, a tout leur
pooir, la ou li rois se tenoit adonc et li Despensier, qui estoit
bonne ville, grosse et rice et fortement fremee, seans sus un bon port de mer. Et si y
a un chastiel trop durement fort, seant sus mer, siques li mers flote tout autour. La
endroit se tenoit li rois, messires Hues li Despensiers, li peres, qui estoit
priés en l’eage de quatre vins et dis ans, messires Hues, li filz, pb 11 r (vol. 1)