Quant la feste fut passee le dit messire Huon qui point n’estoit aimé la endroit fut illec amené pardevant la royne et tous les barons et nobles hommes qui la estoient assembléz. Lors lui furent la recordéz tous ses faitz par escript et oncques ne dist riens a l’encontre. Si fut jugié par plaine sentence des barons, des contes et chevaliers a estre justicié par tele maniere comme vous orréz. Premierement il fut trayné a son de trompetes et de clairons sur ung bahu par toute la ville de Harfort de rue en rue, et puis fut amené en une grant place en la ville, la ou tout le peuple estoit assemblé. La fut il loyé molt fault sur une eschielle, telement que chascun petitz et grans, le pouoient bien veoir, et avoit fait en la dicte place ung tres grant feu. Quant il fut ainsi loyé, on lui coupa tout premierement le vit et les couillons pour tant qu’il estoit heretique et sodomite ainsi qu’on disoit mesmement du roy et pour ce avoit le roy dechassee la royne de lui et par son ennortement. Quant le vit et les couillons furent de lui coupéz, on les getta ou feu pour ardoir. Et aprés lui fut le cueur coupé hors du ventre et getté ou feu pour tant qu’il estoit pb 11 v