pb 3 vplus que tout le monde. Et vouloit le dit seigneur maistrier et surmonter tous les seigneurs et les barons d’Angleterre. Par quoy advindrent depuis au paÿs et a eulx mesmes moult de maulx et de tourmens. Car, aprés la grant desconfiture de Struvelin, la ou le roy Robert de Brus, roy d’Escoce, avoit desconfit ce roy d’Angleterre et toutes ces gens, si comme dessus est dit, grant hayne et grant murmure multiplia ou paÿs d’Angleterre entre les nobles et barons et le conseil du roy mesmement encontre le dit seigneur Huon le Despencier. Et lui mectoient sus que par son conseil ilz avoient esté desconfiz et que, par tant qu’il estoit favourable au roy d’Escoce, il l’avoit tant conseillié et tenu le roy d’Angleterre en negligence que les Escotz avoient reconquiz la bonne cité de Bervich et ars quatre journees ou cinq pardedens leur paÿs, et eulx au derrier desconfiz en bataille et mis en chace, et porté tresgrant dommaige. Et sur ce les dis barons d’Angleterre eurent plusieurs fois parlement ensamble pour adviser et regarder qu’ilz en pourroient faire.
¶ Desquelz le conte Thomas de Lenclastre, oncle du roy, et qui estoit le plus grant et le plus principal de tous les autres se faisoit chief. Car moult lui desplaisoient les usaiges que le roy avoit empris. Et en parla par deux ou par trois foiz assés ouvertement au dit Despensier.
¶ Or, s’apparceut li dit Despencier comment on murmuroit sur luy et sus cest affaire. Si, se doubta trop fort que les grans maulx ne luy en venissent, ainsi qu’il fit. Mais ce ne fut mye si trestost. Ainçois eut il fait molt de choses dommagables au païs, si comme vous orrés cy aprés.
SHF 1B-5 sync Comment le Despensier par son enhortement qu’il faisoit le roy d’Angleterre fit decoler XXII des plus grans seigneurs du roiaume et mit division entre le roy et la royne sa femme. Chapitre V.Il qui estoit bien du roy, et si prochain qu’il vouloit, et plus creü tout seul que tout le monde, s’en vint au roy et lui dist que ses seigneurs avoient fait alliance contre lui, et qu’ilz le mecteroient hors de son royaume, s’il ne s’en prenoit garde. Tant fit par son enhort et par son subtil pourchaz, que le roy feit a ung jour prendre tous ses seigneurs a ung parlement la ou ilz estoient tous assembléz, et en fit decoler sans delay et sans cognoissance de raison jusques a XXII des plus haultz barons d’Angleterre, et tout premier le conte Thomas de Lenclastre, qui estoit son oncle, preudomme et sainct homme, et fit depuis de beaux miracles ou lieu ou il fut decolé.
¶ Pour laquel chose le dit messire Hues acquist moult grant haine de tout le paÿs, et par especial de la royne d’Angleterre et du conte de Quent, qui estoit frere au dit roy. Encores ne se cessa point le dit messire Hue d’enhorter le roy a mal faire.
¶ Car, quant il apparceut qu’il estoit mal de la royne et du conte de Quent, il mist descord entre le roy et la royne et du conte de Quent par sa malisce tellement, que le roy ne vouloit poinct veoir la royne ne venir en lieu ou elle fust. Et dura ce descord assés longuement, et fut dit a la royne et au conte de Quent tout secretement, pour eviter les perilz ou ilz estoient par le fait du Despencier, que, s’ilz demouroient longuement au païs, le roy, par hastif conseil et male information, leur feroit souffrir du corps peine, si comme il avoit entendu. Dont, quant la royne et le conte de Quent oyrent les nouvelles, si se doubterent. Car ilz sentoient le roy hastif pb 4 r