pb 9 vcar maintenant on ne parle que de glayves ou de jaques. Et vous dy que ces seigneurs dessus nommés oulrent en convent aux gens du roy d’Angleterre qu’ilz herdroient avec les aultrez seigneurs d’oultre le Ryn qui bien avoient pouoir d’avoir maintes gens darmes maiz qu’ilz eussent le pourquoy. Puis prindrent congié les dessus diz seigneurs almans, et s’en alla chascun en son hostel, et les seigneurs d’Angleterre demourerent encore a Valenchiennes deléz le conte par le quel conseil du quel iceulx Angloiz ouvroyent le plus.
¶ Si envoyerent encore souffisans messagiers pardevers l’evesque du Lyege. Maiz il ne voult oncques entendre a eulx ne riens faire contre le roy de France a qui il estoit devenu homme et entré en feaulté.
¶ Le roy Charles de Behaingne ne fut point priéz ne mandés, car l’en savoit bien qu’il estoit si conjoingt au roy de France pour le mariage de leurs enffans, du duc de Normendie, Jehan, qui avoit a femme madame Bonne, fille au dessus dit roy, car pour celle cause il ne feroit riens contre le roy de France.
¶ Or me tayray ung petit d’eulx, et parleroy d’unne aultre matiere qui a ceste se joindra.
SHF 1-59 sync La maniere et les meurs de Jaquemart d’Arthevelle. Et comment les Angloiz acquirent sa faveur et amour.En ce temps dont j’ay parlé avoit grant discencion encontre les Flamencs le conte Louys de France. Car ilz ne voulloient point obeir a luy. Si que a painnes s’osoit il tenir en Flandres fors en grant peril. Et avoit pour lors ung homme a Gand brasseur de myel qui estoit en si grant fortune, et en si grant grace de tous les Flamencs que c’estoit tout fait et canque il voulloit faire deviser et commander par tout Flandres du long et du let. Et n’y avoit aucun tant fust grant qui osast trespasser ses commandemens. Il avoit tousdiz allant en aval la ville de Gant aprés ly LX ou IIIIXX varlés armés, entre lesquieulx il en avoit deux ou trois qui bien savoyent ses secréz. Et quant il encontroit ung homme en souspeçon cilz estoit tantost tués puis qu’il l’eust commandé a ses secréz varles et dit, car il leur avoit dit : "Sitost que je encontreray ung tel homme et je vous faiz ung tel signe si l’occises con grant ou con hault il soit sans aultre parolle."
¶ Ainsi advenoit souvent et en fist en ceste maniere plusieurs grans maistrez tuer, pourquoy il estoit si doubtés que nul n’osoit parler contre chose qu’il voulsist faire ne a painne penser de lui contredire. Et tantost que les LX varlés l’avoient convoyé a son hostel chascun alloit disner en sa maison. Et tantost que chascun avoit disné ilz revenoient et se tenoyent devant son hostel jusques ad ce qu’il yssoit hors pour aller parmi les rues jouer et esbatre, et ainsi le conduisoient jusques a soupper. Et sachiéz que chascun de ces souldouyers avoit chascun jour quatre gros de Flandres pour ses fraiz et pour ses gaiges. Et les faisoit paier par chascune sepmainne. Et aussi avoit il, par touttes les villes et chasteaulx et chastelleries de Flandres sergens et souldoyers a ses gaiges. Et les faisoit paier par chascune sepmainne pour fere tous ses commandemens, et espier et savoir s’il avoit nulle part personne qui fust contraire a luy, ne qui dist ne enfourmast nully contre ses volentés. Et si trestost que il en savoit en une ville aucun, il ne cessast jamaiz tant qu’il fust occiz ou bany sans depport ja ne s’en sceust garder. Et meismement tous les plus grans de Flandres, chevalliers et escuiers, bourgoiz de bonnes villes, qu’il pensoit qu’ilz fussent favourables au conte pb 10 r