pb 7 rqui estoit hardy chevalier ung oeuil par ses hardies entreprinses par ces grans marestz et forestz la ou ces seigneurs d’Escosse se tenoient. Et la ou se estoit jadiz tenu le dit preux roy Robert d’Escosse, par plusieurs foiz, quant le roy Edouart, ayel a cestuy dont nous parlons presentement, l’avoit desconfit, et concquist tout le royaume d’Escosse. Et plusieurs fois fut il mené et dechassé qu’il ne trouvoit nully en son royaume qui l’osast hebergier ne soustenir en chastel ne en forteresse pour la doubtance du roy Edouart qui avoit si nettement concquis tout Escosse qu’il n’y avoit ville, chastel ne forteresse qui n’obeist a luy.
¶ Et quant ce roy Edouart estoit arriere venu en Angleterre, ce preux roy Robert rassembloit gens quelque part qu’il les pouoit trouver, et aprés reconcqueroit ses chasteaulx, ses forteresses et ses bonnes villes jusques a Berinch, les unes par force et par bataille et les aultres par beau parler et par amour.
¶ Adont quant le roy Edouart le savoit il avoit grant despit. Et faisoit semondre ses ostz et ne cessoit jusques a tant qu’il avoit desconfist et reconcquis le royaume d’Escosse aussi comme devant.
¶ Ainsi advint entre ces deux roys si comme j’ay ouy recorder que ce roy Robert reconcquist derechief son royaume par chinq foiz. Et ainsi se maintindrent ces deux roys que on tenoit en leur temps pour les plus preux du monde.
¶ Tant que le bon roy Edouart fut trespassé, et trespassa en la bonne cité de Berinch. Et avant qu’il mourust, il fist appeller son ainsné filz qui fut roy aprés ly, pardevant tous ses barons et ses hommes. Et luy fist jurer sur Sains que si tost qu’il seroit trespassé, il le feroit bouillir en une chaudiere, tant que la char se partiroit des os. Et feroit la char mettre en terre. Et garderoit les os de son pere. Car il tenoyt fermement que tant qu’il avoit ses os avecques ly, les Escos n’aroient point victoire contre ly. Lequel n’acomplist mye ce qu’il avoit juré. Ains fist rapporter son corps a Londres et la ensevelir contre son serment, pourquoy il luy meschey depuis en plusieurs manieres si comme vous avéz oÿ. Et premierement en la bataille d’Estrimelin, la oulrent les Escos victoire contre ly.
SHF 1-54 sync Comme le roy Philipe de France alla veoir le pape Benedic en Advignon, et la print la croix et plusieurs aultrez roys, princes et barons pour aller contre les Sarrazins.Apres ce que le jeune roy d’Angleterre oult fait hommaige au roy Phlippe de France de la conté de Pontieu, et de tout ce qui luy appartenoit fa faire, ot le roy Phlippe grant devocion de aller veoir le saint pere Benedic, qui pour le temps regnoit en Advignon, et de visiter une partie de son royaulme.
¶ Adont fist faire a celle instance ses pourveances grandes et grosses. Et se parti de Paris en tresgrant arroy le roy de Behaingne et le roy de Navarre en sa compaignie. Et aussi grant foison de ducs et de contes et de seigneurs. Car il tenoit grant estat, et faisoit grans livrees et grans despens.
¶ Si chevaucha ainsi le roy parmy Bourgoingne. Et fist tant par ses journees qu’il arriva en Advignon, ou il fut moult sollempnellement receu du Saint Pere et du colliege et le honnourerent du plus qu’ilz peurent. Et furent depuis grant terme la environ avecques le pappe et les cardinaulx. Et se logoit a Villeneufve dehors Advignon.
¶ Adont vint le roy d’Arragon en ycellui meismes temps ausi a court de Romme pour luy veoir et festoier, si y ot grans festes et grans solempnités a leurs approuchemens et a les assemblees, et furent la tout le Karesme ensivant.
¶ Dont il advint que certainnes lettrez et nouvelles vindrent en court de Romme, que les ennemys de dieu estoient moult fort esveillés contre la Saintte Terre. Et avoient presque concquis tout le royaume de Rasse. Et prins le roy qui s’estoit de son temps crestienné. Et fait mourir a grant martire. Et si pb 7 v