pb 24 rpourvey le conte de gens d’armes et manda tous les chevaliers et les escuiers de son paÿs. Et aussi fist il en Brebant et en Flandres. Et tant fist qu’il ot bien XM hommes armés de fer de bonne estoffe et tous a cheval. Si se partirent de Mons en Haynau et de la environ et chevauchierent devers Chimay. Car l’intencion du conte et de son oncle estoit telle qu’ilz yroient ardoir et exillier la terre au seigneur de Brainne. Et aussi Aubenton en Terasse.
SHF 1-95 sync De la ville d’Aubenton qui fut rourue, prinse et pillee par les Henuyers, et en contrevengant leur domage.Bien se doubtoient ceulx de la ville d’Aubenton du conte de Henau et de son oncle. Si l’avoient signiffié au grant bailly de Vermendoiz qu’il leur voulsist envoier gens pour eulx tenir et deffendre contre les Henuiers qui leur estoient trop prouchains voisins. Et leur estoit besoing que ilz eussent avecques eulx bonnes gens d’armes. Car leur ville n’estoient fermee que de paliz. Si envoya le bailly assés de bons chevaliers de la environ. Premierement le vydame de Challons, monseigneur de Beaumont, messire Jehan de la Bove, monseigneur Jehan de Los et plusieurs aultrez. Si estoient les dessus diz chevalliers et leur routte bien CCC armeurez de fer mis dedens Aubenton. Et la pensoient bien tenir contre les Henuyers. Et reparerent et fortiffierent encore en aucuns lieux ou eulx tenoient qu’elle estoit la plus flebe. Et estoient tous confortés et pourveüs de attendre les Henuiers qui pas ne firent long sejour depuis qu’ilz furent assemblés a Mons en Henau. Ains se partirent vistement et a grant arroy. Et s’acheminerent vers Chymay comme dit est. Et par ung vendredi passerent et tant exploitterent qu’ilz se logierent a ce soir assés pres d’Aubenton. Et adviserent au quel costé elle estoit plus prenable.
¶ A l’endemain ilz vindrent devant a bannieres desploiees pour assaillir les arbalestiers devant, si se partirent en trois conestablies chascun a sa baniere dont le conte de Henau oult la premiere bataille et avecques luy maintez bonnes gens, le sire de Beaumont, ot la seconde. Et le sire de Fauquemont avecques grant foison d’autres gens allemans ot la tierche.
¶ Si se trahy chascun a sa baniere et entre ses gens celle part la ou ilz furent ordonnés pour assaillir. Si commencha ly assault si grandement et fort durement, et si emploierent hommes arbalestiers et dedens et dehors comenchierent a traire moult fort par quoy plusieurs tant assaillans comme deffendans furent blechiés. Le conte de Henau et sa routte ou avoit moult de chevaliers et d’escuiers vindrent jusques aux baillez de l’unne des portes la ot grant assault et forte escarmuche. La estoit le vydame de Challons ung appert homme qui y fist moult de merveilles en fait d’armez. Et qui moult vassaument se deffendi. La meismes a la porte fist il trois de ses filz chevaliers qui moult bien s’acquitterent a leur nouvelle chevalerie, et y firent plusieurs appertises d’armez. Mais ilz furent si fort requis et assailliz du conte de Henau qu’il les convint la retraire dedens la porte, car ilz perdirent leurs bailles et les concquirent les Henuiers et le pont aussi. La ot grant escarmuche dure et aspre assault et fort. Car ceulx qui estoient montés sus la porte gettoient baux et mesriens et planté de pierres avecques pos plains de chaux dont ilz navroient et mehaingnoient gens se ilz n’estoient fort armés. Et la fut aconsuiz du get d’unne grosse pierre ung escuier de Henau qui se tenoit tout devant pour son corps avanchier et se nommoit Baudouin de Beaufort. Auquel l’en donna si grant horion sur la targe qu’elle escartela et fendy en deux moittiéz si qu’il ot le bras rompu, pourquoy il le pb 24 v