pb 16 rque le gens estoient a la messe. Et entrerent les diz Normens dedens et gaingnerent la ville et la prindrent de fait et puis la pillerent et roberent tout entierement et y tuerent plusieurs gens. Et y viollerent plusieurs femmes et pucelles dont ce fut dommage, puis eulx chargierent leur vaisseaux du pillage de la ville qui bien estoit garnie de richesses. Et puis quant les flos de la mer furent revenus ilz singlerent a explois de vent tant qu’ilz vindrent en Normendie. Et s’en vindrent raffreschir a Dyeppe. Et la departirent leur butin et pillage.
¶ Or retournerons au roy angloiz qui fort s’appareilloit pour venir devant Cambray.
SHF 1-75 sync Comment le roy angloiz et ses alliéz assiegerent la ville de Cambray.Le roy angloiz se parti de Mallines et vint a Brucelles pour parler au duc de Brebant. Et touttes ses gens passerent au dehors.
¶ Adoncques s’avallerent Flamens efforcheement, le duc de Guerles, le marquis de Juillers, le marquis de Blanquebourc, le conte de Mons, le conte de Flames, le sire de Fauquemont. Et briefment tous les seigneurs aliéz au roy angloiz qui estoient de l’Empire, lesquieulx estoient bien XXM hommes.
¶ D’autre part estoit messire Jehan de Haynau qui grossement se appareilloit pour estre en ceste chevauchee, maiz il se tenoit decoste le conte de Henau son nepveu.
¶ Quant le roy angloiz et messire Robert d’Artoiz furent venus a Brucelles, et ilz eurent parlé au duc de Brebant assés longuement, ilz ly demanderent quelle estoit son intencion.
¶ Aux quieulx respondi le duc que si tost qu’il pourroit savoir qu’il aroit assiegé la cité de Cambroy, il se retrairoit celle part atout IIC lances bien estoffees.
¶ Ceste responce plust adoncques au roy angloiz asséz. Si se parti le roy de Brucelles et passa parmi la ville de Nievelle ou il gut une nuit. Et l’endemain vint a Mons en Haynaut. Et la trouva il le jeune conte, son serourge, et messire Jehan, son oncle, qui le recueillirent moult lyement avecques messire Robert d’Artoiz qui tousjours estoit deléz lui, et son plus secret conseil. Et environ XVI chevaliers barons d’Angleterre que le roy menoit avecques ly par honneur et pour le conseiller. Et avecques ce y estoit l’evesque de Lincolle qui moult estoit vaillant homme.
¶ Si reposa le roy deux jours a Mons en Henau ou il fut tresgrandement festoyé tandiz que ses gens passerent par le plain paÿs. Et se logoient ainsi qu’ilz venoient, et trouvoyent pour l’argent tout ce qui leur estoit mestier. Dont les aucuns payoient et les aultrez non.
¶ Puis s’en vint le roy a Vallenciennes ou il entra tant seullement lui XIIe de chevaliers. Et la estoient ja venus le conte de Haynau et son oncle, sire d’Anghien et le sire de Feugnerolles et plusieurs aultrez qui se tenoient deléz le conte leur seigneur. Et receurent le roy angloiz moult lyement. Le conte print le roy par la main, et le mena jusques a la Salle qui moult bien estoit appareilliee, et pour le recevoir. Dont il advint que en montant en la Salle, l’evesque de Lincolle qui la estoit leva sa main et dist:
¶ "O Guillaume d’Ausonne, evesque de Cambray, je vous admonneste comme procureur du roy d’Angleterre, vicaire de l’empereur de Romme, que vous luy veuillés ouvrir la cité de Cambroy, ou aultrement vous vous forffaittes. Et y entrerons a force." Dont nulz ne respondi a celle parolle, car l’evesque n’estoit pas la present.
¶ Encore parla l’evesque de Lincolle. Et dit: "Conte de Henaut, nous vous admonnestons depar l’empereur de Romme que vous venés servir le roy d’Angleterre son vicaire devant la cité de Cambray a tout ce que vous y devés de gens." Au quel le conte qui la estoit respondi: pb 16 v