pb 81 vles clers et les bourgois a grant pourcession contre le conte d’Erbi et lui firent toute honneur et reverence a leur pouoir. et lui abandonnerent vivres et pourveances et toutes autres choses a prendre a son aise et voulenté. Le conte les remercia grandement de leur courtoisie et de ce qu’ilz lui offroient. Ainsi se tint le conte d’Erbi en la cité de Bordeaux avec ses gens si s’esbatoit et jouoit entre les bourgois et bourgoises de la ville.

Or lairons nous un petit a parler du conte d’Erbi et parlerons du conte de Laille que se tenoit en la Riolle. Si savoit bien le conquest que le conte d’Erbi faisoit et point ny pourvei de remede. Quant le dit conte de Laille oy que le conte d’Erbi estoit retrait au sejour a Bourdeaux et avoit espars ses gens et rompu sa chevauciee et n’estoit mie apparant que de la saison, il en feist plus. Si s’avisa le dit conte qu’il feroit une semonce et mandement especial de gens d’armes et yroit assegier le chastel d’Auberoce. Ainsi le fist. Si escript au conte de Pierregort, a cellui de Quarmain, a cellui de Commines, a cellui de Brunkiel et a tous les barons de Gascoingne, qui François se tenoient, qu’ilz fussent a un jour qu’il leur assigna devant Auberoce car il y vouloit mettre le siege. Les dessus dis vicontes, barons et chevaliers de Gascoigne obeirent a lui car il estoit comme roy es marches de Gascoingne et assemblerent leurs gens et leurs hommes. Et furent tous appareilliés au jour qui assigne y fu et vindrent devant Auberoce tellement que ceulx qui le garderent ne s’en donnerent de garde. Si se virent assegiés de tous costéz mais comme gens de bon arroy, ilz ne furent de riens esbahiz mais entendirent a leurs gardes et a leurs defenses. Le conte de Laille et les autres barons qui la estoient venuz a grant puissance se logierent tout environ tellement que nulz ne pouoit entrer en la garnison qu’il ne fust apparceuz et envoierent querre IIII grans engins a Thoulouse et les firent achacier et ducier devant la forteresse. Et n’assailloient les François d’autre chose fors de ces engins qui nuit et jour gettoient pierres et les esbahissoit plus que autre chose. Car dedens VI jours ilz rompirent la plus grant partie des combles des tours et ne s’osoient les chevaliers ne ceulx du chastel tenir fors es chambres voultees parterre. Et estoit l’entention de ceulz de l’ost qu’ilz les occiroient ou ilz se renderoient simplement. Bien estoient venues les nouvelles a Bordeaux au conte d’Erbi et a monseigneur Gautier de Mauny que leurs compaignons estoient assiz dedens Auberoce mais point ne savoient qu’ilz fussent si apresséz.

Quant messire Franque de Halle, messire Alain de Finefroide et messire Jehan de Lindehalle virent l’oppression que les François y faisoient et si ne leur apparut confort ne aide de nulle part, si se commencierent a esbahir et se conseillierent. "Il ne puet estre", distrent ilz, "que se le conte d’Erbi savoit le dangier ou ces François nous tiennent qu’il ne nous secourust a quel meschief que ce fust. Si seroit bon que nous lui feissions savoir mais que nous peussions trouver message." Adont demanderent ilz entre leurs varléz s’il en y avoit nul qui voulsist gaingnier et porter ceste lettre qu’ilz avoient escriptes a Bourdeaux et baillier au conte d’Erbi. Lors s’avança un varlet et dist qu’il la porteroit bien et voulentiers et ne le feroit pas tant pour la convoitise du gaingnier comme pour eulx delivrer de ce peril. Les chevaliers furent moult lies du varlet qui s’offroit pour ce faire. Quant ce vint au soir de nuit le vallet prist les lettres que les chevaliers lui baillierent seellee de leurs seaulx et lui consurent en ses draps, puis lui firent avaler es fosséz. Quant il fu on fons, il monta contrement et se mist en voie parmy l’ost car autrement ne pouoit il passer. Si fu encontré du premier guet et ala oultre car il savoit bien parler gascoing et nomma un seigneur de l’ost disant qu’il estoit a lui. On le laissa passer atant mais il fu repris au dehors des tentes d’autres vallés qui l’amenerent devant le chevalier du guet. La ne peut pb 82 r