pb 70 ront rescous ceulz de Haimbont et remiz en leur forteresce." Quant messire Loÿs d’Espaigne qui la estoit a l’assaut entendy ce, il fu moult courroucié et se tint pour deceu. Si demanda quel part les Englois et Bretons estoient qui rescous les avoient. On lui dist qu’ilz estoient ja ou bien pres retrais en leur garnison dont se retray monseigneur Loÿs d’Espaigne vers les logeis tout malentiz et laissa la bataille aussi comme par ennuy. Aussi se commencierent a retraire toutes manieres de gens. En ce retrait furent pris II chevaliers bretons de la partie la contesse qui trop s’avancierent. Ce fu le sire de Landermau et le chastellain de Guinguant dont messire Charles de Blois eut grant joie. Quant les deux parties se furent retrais, l’en prescha tant la nuit en la tente messire Charles de Blois aux II chevaliers bretons prisonniers qu’ilz se tournerent de la partie monseigneur Charles de Bloys et lui firent feauté et hommage et relenquirent la contesse de Monfort qui maint bien leur avoit fait et pluseurs dons donnéz de quoy on parla moult et murmura dedens la ville de Haimbont sur leur affaire.

Trois jours aprés ceste avenue tous ces seigneurs de France qui la estoient au siege pardevant Haimbont et se assemblerent en la tente monseigneur Charles de Bloys pour avoir conseil qu’ilz feroient. Car ilz veoient bien que la ville et le chastel de Haimbont estoient si fors qu’ilz n’estoient mie a gaignier tant avoit dedens de bonnes gens d’armes qui moult petit les doubtoient ainsi qu’il estoit apparu et leur venoient tous les jours pourveances et vitailles par la mer. D’autre part le paÿs d’entour estoit si gasté qu’ilz ne savoient mais ou aler fourer. Et si leur estoit l’yver prochian par quoy ilz ne pouoient la longuement demourer si que tous ces poins consideréz ilz s’accorderent qu’ilz se partiroient de la et se conseillierent en bonne foy a monseigneur Charles de Bloys qu’il meist par toutes les citéz, bonnes villes et es forteresces qu’il avoit conquises bonnes garnisons et fortes et si vaillans cappitaines qu’il se peust affier en leur garde par quoy les ennemiz ne les peussent reconquerre. Et aussi se aucuns vaillans homs se voulsist entremettre de prendre et donner une treve jusques a la Penthecouste, il s’i accordast voulentiers. SHF 1-180 sync Ainsi se departy l’ost des seigneurs et autres entre la Saint Remy et la Toussains, l’an de Grace mil CCC XLII. Si rala chascun en sa contree. Et le dit messire Charles s’en rala pardevers la ville de Carahéz a tous les barons et nobles seigneurs de Bretaingne qu’il avoit la endroit de sa partie. Si retint avec lui plusieurs seigneurs de France pour lui conseillier. Quant il fu venu a Carahés endementiers qu’il entendoit a ordonner de ses besoingnes et de ses garnisons, il avint que un grant bourgois et riche marchant qui estoit de la ville que on claime Jugon. Au encontre de son mareschal monseigneur Robert du Beaumanoir si fu pris et amenéz a Carahéz pardevant monseigneur Charles de Bloys. Ce bourgois faisoit toutes les pourveances madame la contesse de Monfort a Jugon et autre part. Et estoit moult amé et creü en la ville de Jugon qui est moult forment fermee et siet tres noblement et aussi fait le chastel qui est bel et fort et se tenoit de la partie d’icelle contesse si y estoit chastellain depar elle I chevalier moult gentil homme qui avoit nom monseigneur Gerart de Rochefort. Ce bourgois qui fu pris eut grant paour de mourir si pria que on le lassast passer par raençon. Messire Charles briefment a parler le fist tant examiner et enquerre d’unes choses et d’autres qu’il en couvenanca rendre et trahir la forte ville de Jugon et se fist fort qu’il livreroit l’une des portes ouverte par nuit a certaine heure. Car il estoit tant creüz en la ville qu’il en gardoit les clefs, et pour ce mieux asseurer il en mist son filz en hostage. Et messire Charles l’en promist donner VC livres de terre heritablement. Ce jour vint, la porte fu ouverte a mienuit, messire Charles et ses gens entrerent en la ville de Jugon a celle pb 70 v