pb 54 veu un autre frere germain de pere et de mere qui trespasséz estoit si en estoit demouree une joenne fille laquelle le dit duc son oncle avoit mariee a monseigneur Charles de Bloys, maisné filz au conte Guy de Bloys, de la suer du roy Phelippe de France qui adont regnoit. Et lui avoit promiz en mariage la duchié de Bretaigne aprés son decés pour ce qu’il se doubtoit que le conte de Monfort, son frere, n’y voulsist clamer droit par proismeté aprés son decés comment qu’il ne fust mie son frere germain. Et il sembloit au dit duc que la fille de son frere germain devoit estre par raison plus prouchaine pour avoir la duchié aprés son decés que le conte de Monfort son frere. Et par tant qu’il avoit toudiz doubte que son frere le conte de Monfort n’enforçast aprés son decés le droit de sa joenne niepce par puissance la maria il au dit monseigneur Charles de Bloys en celle entente que le roy Phelippe, qui estoit son oncle, lui aidast mieux et plus voulentiers a garder son droit encontre le dit conte de Monfort s’il le voulsist entreprendre. Si avint tout ce que le duc avoit toudiz doubté car si tost que le conte de Monfort peut savoir que le duc son frere fu trespasséz sur le chemin de Bretaigne, il se trait tantost a Nantes, qui est le chief et la souveraine cité de Bretaigne et fist tant aux bourgois et a ceulx du paÿs environ qu’il fu receu a duc comme le plus proisme du duc son frere qui trespassé estoit et lui firent tous feauté et hommage comme a duc de Bretaigne et au seigneur. Quant il eut pris la feauté des bourgois de Nantes et du paÿs d’entour Nantes, il et la contesse sa femme qui bien avoit cuer d’omme et de lyon eurent conseil ensemble qu’ilz tenroient une court et feste solempnelle a Nantes et manderoient tous les barons et les nobles du paÿs de Bretaigne et les consauls des bonnes villes et de toutes les citéz qu’ilz voulsissent estre et venir en celle court pour faire feaulté a lui comme a leur droit seigneur. Et pour ce envoierent grans mesages.

Ce pendant et la feste attendant il se party de Nantes a grant foison de gens d’armes et s’en ala vers la bonne cité de Limoges, car il estoit informe que le grant tresor que le duc son frere avoit amasse de long temps estoit la enferme. Quant il vint la entra en la cité a grant boban et fu noblement receu des bourgois et de toute la clergié et la communauté de la cité. Si lui firent tous feauté comme a leur droit seigneur et lui fu tout ce grant tresor delivré par le grant accort qu’il acquist aux bourgois de la cité par grans dons et promesses qu’il leur fist. Et quant il eut la tant festoié et sejourné qu’il lui pleut il s’en party a tout le grant tresor et revint droit a Nantes la ou madame sa femme esoit qui eut grant joie du grant tresor que son seigneur eut trouvé. Si demourerent a Nantes tous quois grant feste demenant jusques a tant que la feste devoit estre et la grant court tenue et faisoient tresgrans pourveances pour celle grant feste parfournir. Quant le jour de celle feste fu venu et nul n’y venoit pour mandement qu’il eust fait fors un seul chevalier que on clamoit monseigneur Henry de Leon noble homme et puissant le dit conte de Monfort et la contesse sa femme en furent durement courrouciés et esbahis. Ilz firent leur feste par III jours des bourgois de Nantes et des bonnes gens de la entour au mieux qu’ilz peurent si eurent grant despit des autres qui n’avoient daignie venir a leur mandement. Et eurent conseil entr’eulx de retenir soudoiers a pié et a cheval tous ceulx qui venir voudroient et de partir ce grant tresor que trouvé avoient pour mieulx venir le dit conte a son propos de la dicte duchié de Bretaigne et pour contraindre tous rebelles de venir a sa mercy. A ce conseil se tindrent tous ceulx qui la furent, chevaliers, clers et bourgois, et furent retenuz soudoiers venans de tous costéz et largement payes tant qu’ilz en eurent grant plenté a pb 55 r